Fort Brown (Oos-Kaap)

in Wikipedia, die vrye ensiklopedie
Spring na: navigasie, soek
Fort Brown
Fort Brown

Fort Brown was een van die grootste forte wat tydens die Kaapse grensoorloë (1779-1877) aan die oosgrens van die Kaapkolonie opgerig is. Die fort lê aan die R67 (die Queen's Road), 27 km van Grahamstad in die rigting van Fort Beaufort, noord van die Eccapas en by die brug oor die Groot-Visrivier.

Na die Vierde Grensoorlog (1812) is 'n reeks militêre poste langs die Groot-Visrivier gestig. Gedurende die Sesde Grensoorlog (1834-5) is die pos by Hermanuskraal uitgebou tot 'n volwaardige fort en vernoem na sy tweede bevelvoerder. Die fort is in 1838 voltooi en het bestaan uit 'n aantal barakke met ruimte vir die ruiters en hul perde binne 'n hoë ringmuur. In een hoek was 'n 4 m hoë vierkantige toring met sye van ongeveer 3½ m. 'n Kliptrap lei na die vertrek met die skietgate, onder was die magasyn en bo plek vir die swaaikanon.

Maqoma, seun van Gaika, was een van die bekendste persone wat hier gevange gehou is. Enkele meter hiervandaan is die grafte van nege soldate wat op 15 Junie 1852 in gevegte in die omgewing gesneuwel het.

Die fort is tot 1861 beman en is sedertdien as kerk en ontspanningsterrein gebruik, dit dien nou nog as 'n polisiekantoor. Die winkel wat hierdie klein nedersetting (in die Makana Plaaslike Munisipaliteit) by die fort bedien het, het reeds jare gelede sy deure gesluit. In 1938 is die toring en oorblywende mure tot nasionale gedenkwaardigheid verklaar.

Bibliografie[wysig | wysig bron]

  • Logie, Bartle: Water in the wilderness. Port Elizabeth: Bluecliff, 2006. ISBN 0-620-36163-8

Sien ook[wysig | wysig bron]

Koördinate: 33°7′47.6″S 26°37′3″O / 33.129889°S 26.61750°O / -33.129889; 26.61750