Gereformeerde kerk Wilropark

Gereformeerde Kerk Wilropark
Sluit in	Breunanda (Roodepoort-deel) Roodekrans Wilropark
Klassis	Wesrand
Huidige predikant(e)	A.S.A. (Stefaans) de Bruyn
Belydende lidmate	276
Dooplidmate	82
Adres	H.v. Kiepersol- en Haakdoringstraat Wilropark, Roodepoort
Geskiedenis
Stigtingsdatum	7 Junie 1981
Afgestig van	Roodepoort
Eerste predikant	G. du Plessis

Die kerkgebou, einde 2017.

Ds. Gideon du Plessis, leraar van 1981 tot 1997, toe hy sy emeritaat aanvaar.

Die Gereformeerde kerk Wilropark is die jongste gemeente van die Gereformeerde Kerke in Suid-Afrika in die Wes-Randse stad Roodepoort.

Wilropark het op 7 Junie 1981 van die Gereformeerde kerk Witpoortjie afgestig wat op sy beurt op 8 Oktober 1972 van die Gereformeerde kerk Roodepoort afgestig het, ’n dogtergemeente van die Gereformeerde kerk Florida. Wilropark is dus ’n agterkleindogter van die Gereformeerde kerk Krugersdorp, wat op 25 April 1896 as die eerste Gereformeerde kerk aan die Witwatersrand gestig is, ’n maand voor die Gereformeerde kerk Johannesburg.

In 1983 het die kerkraad die argitek Albert Monteith, wat ook verantwoordelik was vir die Gereformeerde kerk Brackenhurst, opdrag gegee om ’n doelmatige kerkgebou met sewe katkisasielokale te ontwerp. Vir dié doel het die gemeente ’n erf aangekoop wat uitkyk op ’n natuurreservaat. Op 24 Augustus 1985 is Wilropark se kerkgebou amptelik in gebruik geneem. Weens ’n geldtekort kon die gemeente nie hul planne vir ’n klok, orrel en die katkisasielokale uitvoer nie, maar hulle kon wel ’n tweedehandse Ahlbon-orrel aankoop, wat in 1994 plek gemaak het vir ’n elektroniese Allen-orrel. Dié instrument se luidsprekers is in die vorm van ’n kruis voor in die kerk aangebring.

Predikante

1. Du Plessis, Gideon, 1981–1997 (aanvaar sy emeritaat; met afstigting oorgekom vanaf moedergemeente Witpoortjie)
2. Van Rhyn, dr. Hercules Philippus Malan, 1998–2004 (oorgekom vanaf Witpoortjie)
3. De Bruyn, Albertus Stefanus Andries, 2005 – hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.