Gita Ramjee

in Wikipedia, die vrye ensiklopedie
Jump to navigation Jump to search
Gita Ramjee
Gebore
Gita Parekh

(1956-04-08)8 April 1956
Sterf31 Maart 2020 (op 63)
NasionaliteitSuid-Afrikaans
Alma materUniversiteit van Sunderland, Engeland
Universiteit van KwaZulu-Natal
Bekend virMIV-navorsing
Mikrobisiede vir seksueeloordraagbare siektes

Gita Ramjee FRCPE (nee Parekh; 8 April 1956 - 31 Maart 2020) was 'n Ugandese-Suid-Afrikaanse wetenskaplike en navorser in MIV-voorkoming. In 2018 is sy bekroon met die 'Uitstaande vroulike wetenskaplike'-prys van die "Kliniese Proewe-vennootskap vir Europese en Ontwikkelende Lande".[1] Sy is in Umhlanga, KwaZulu-Natal oorlede aan COVID-19-verwante komplikasies.[2]

Vroeë lewe en opevoeding[wysig | wysig bron]

Gita Parekh is gebore op 8 April 1955[3][4] en het haar vroeë deurgebring in Uganda, voordat haar gesin in die 1970's onder Idi Amin in ballingskap verdryf is.[4] Sy het die hoërskool in Indië bygewoon voordat sy aan die Universiteit van Sunderland in Engeland studeer het. Sy het 'n BS(Hons) in Chemie en Fisiologie in 1980 behaal. Sy het toe getrou met 'n Suid-Afrikaans-Indiese medestudent, Praveen Ramjee, en verhuis na Durban waar sy in die Departement Pediatrie aan die Mediese Skool aan die Universiteit van KwaZulu-Natal begin werk het. Nadat haar twee seuns gebore is, het sy haar meestersgraad voltooi, en daarna 'n doktersgraad in 1994. Dit was tydens die hoogtepunt van Suid-Afrika se vigsontkenning en verwronge beleid oor vigsbehandelinge. Deel van haar navorsings-subsidies is verskaf deur die Amerikaanse "National Institutes of Health" wat ook inentings aan Suid-Afrika verskaf het.[5]

Loopbaan[wysig | wysig bron]

Nadat sy haar doktorsgraad in niersiektes in kinders voltooi het, het Ramjee haar as wetenskaplike by die Suid-Afrikaanse Mediese Navorsingsraad aangesluit. Sy het gehelp om die eenheid van 22 wetenskaplike personeel tot 350 uit te brei en het 'n belangrike rol gespeel in die uitbreiding van sy internasionale reputasie.[5]

Ten tye van haar dood was Ramjee die hoofwetenskaplike beampte by die Aurum Instituut, 'n nie-winsgewende MIV / Vigs / Tuberkulose-navorsingsorganisasie,[6] asook direkteur van die Suid-Afrikaanse Mediese Navorsingsraad se voorkomingsnavorsingseenheid. Sy was 'n ereprofessor aan die London School of Hygiene & Tropical Medicine, die Universiteit van Washington, en die Universiteit van Kaapstad.[6] Sy was lid van 'n aantal plaaslike en internasionale komitees, waaronder die Akademie vir Wetenskap van Suid-Afrika en die Suid-Afrikaanse Nasionale VIGS-raad.[7]

Navorsing[wysig | wysig bron]

Ramjee het gespesialiseer in MIV-voorkomings- en behandelingsnavorsing en het die fase I tot fase III MIV-voorkoming en behandeling kliniese toetse in die groter Durban-omgewing gelei as die kliniese proefeenheid se hoofnavorser.[7] Ramjee was bekommerd dat die fokus nie net op kliniese toetse moes wees nie, maar op behandeling gepaard met opvoeding en versorging van MIV. In 'n onderhoud het sy gesê: "Vroue word die swaarste getref deur MIV in hierdie streek, en daar is nog baie om te doen om gesondheidskwessies in ontwikkelende lande aan te spreek. Daar is 'n behoefte aan 'n meer holistiese benadering tot MIV-voorkoming, wat reproduktiewe gesondheidsorg vir vroue moet insluit."[5] Ramjee was een van die eerste Suid-Afrikaanse wetenskaplikes wat aan die ontwikkeling van mikrobisiede gewerk het.[8]

As akademikus het sy meer as 170 artikels gepubliseer en was sy ook beoordelaar en redakteur van verskeie wetenskaplike tydskrifte.[7]

Erkenning[wysig | wysig bron]

Ramjee is erken as 'n toonaangewende figuur in die MIV-behandelingsgemeenskap en het verskeie toekennings ontvang, waaronder:

  • Genootskap van die Royal College of Physicians of Edinburgh
  • Die "Lewenslange Prestasietoekenning" op die International Microbicide Conference in 2012.[6]
  • Die "Wetenskaplike Merietetoekenning, Goue medalje" van die Mediese Navorsingsraad in 2017.[8]
  • Die "Uitstaande vroulike wetenskaplike"-prys van die "Kliniese Proewe-vennootskap vir Europese en Ontwikkelende Lande" in 2018.[1]

Dood[wysig | wysig bron]

Ramjee was op 17 Maart 2020 in Londen om 'n lesing te lewer by die London School of Hygiene & Tropical Medicine met die titel "HIV: Diverse uitdagings onder kinders en vroue in Asië en Afrika". Met haar terugkeer na Suid-Afrika het sy sleg gevoel en is sy in die hospitaal opgeneem. Sy is dood aan komplikasies met betrekking tot COVID-19.[6]

David Mabuza, het die huldeblyke gelei wat haar 'n "kampioen in die stryd teen die MIV-epidemie" noem. As voorsitter van die Suid-Afrikaanse Nasionale VIGS-raad het hy gesê: "Die heengaan van professor Ramjee is 'n groot slag vir die hele gesondheidsorgsektor en die wêreldwye stryd teen MIV / vigs."[9] Salim Abdool Karim, direkteur van die Vigsnavorsingsprogramsentrum in Suid-Afrika, het haar werk vir vroue geprys en gesê: "Sy was betrokke by byna elke groot MIV-voorkomingsproef met betrekking tot mikrobisiede ... en was instrumenteel in die ontwikkeling van tegnologieë vir vroue."[8] Die president van die Suid-Afrikaanse Mediese Navorsingsentrum, Glenda Gray, het ook hulde gebring aan haar werk: "Sy het probeer om die hele ekosisteem wat vroue kwesbaar maak, aan te spreek van die biologiese tot die politieke."[8]

Sy word oorleef deur haar man en twee seuns.

Sien ook[wysig | wysig bron]

Verwysings[wysig | wysig bron]

  1. 1,0 1,1 Prof Gita Ramjee ontvang gesogte wetenskaplike toekenning (Engels). SAMRC (28 September 2018). Argief geskep van die oorspronklike op 4 April 2020. URL besoek op 6 April 2020.
  2. "Professor Gita Ramjee, 'n wêreldbekende MIV-wetenskaplike, sterf aan komplikasies van COVID-19". Daily Maverick (in Engels). 1 April 2020. Geargiveer vanaf die oorspronklike op 6 April 2020. Besoek op 6 April 2020.
  3. Genzlinger, Neil (3 April 2020). "Gita Ramjee, 'n toonaangewende VIGS-navorser, sterf op 63" (in Engels). The New York Times. Geargiveer vanaf die oorspronklike op 28 April 2020. Besoek op 6 April 2020.
  4. 4,0 4,1 Nordling, Linda (8 Mei 2007). "Onderhoud: Gita Ramjee: 'n Passie vir voorkoming". The Guardian (in Engels). ISSN 0261-3077. Geargiveer vanaf die oorspronklike op 26 April 2020. Besoek op 6 April 2020.
  5. 5,0 5,1 5,2 "Professor Gita Ramjee". University of Sunderland Alumni Association (in Engels). Geargiveer vanaf die oorspronklike op 6 April 2020. Besoek op 6 April 2020.
  6. 6,0 6,1 6,2 6,3 "Koronavirus: Top Suid-Afrikaanse HIV-wetenskaplike, Gita Ramjee, sterf" (in Engels). BBC News. 1 April 2020. Geargiveer vanaf die oorspronklike op 5 Mei 2020. Besoek op 6 April 2020.
  7. 7,0 7,1 7,2 Gita Ramjee (Engels). University of Washington. Argief geskep van die oorspronklike op 4 April 2020.
  8. 8,0 8,1 8,2 8,3 Kahn, Tamar (1 April 2020). "Wêreld onthou die sagmoedige, vasberade HIV-wetenskaplike Gita Ramjee". BusinessDay (in Engels). Geargiveer vanaf die oorspronklike op 6 April 2020. Besoek op 6 April 2020.
  9. "Adjunkpresident Mabuza dra meegevoel met die afsterwe van professor Gita Ramjee". South African Government (in Engels). 1 April 2020. Geargiveer vanaf die oorspronklike op 6 April 2020. Besoek op 6 April 2020.