Groter Limpopo-vredespark

in Wikipedia, die vrye ensiklopedie
Kaart van die Groter Limpopo-vredespark

Die Groter Limpopo-vredespark is 'n vredespark wat tans in die proses is om gevorm te word. Dit sal uiteindelik sowat 35 000 km² beslaan, alhoewel daar reeds planne is om die park in die toekoms te vergoot tot sowat 99 800 km². Dit sal drie nasionale parke in drie verskillende lande met mekaar verbind. Hierdie parke is die Limpopo Nasionale Park (voorheen bekend as Coutada 16) in Mosambiek, die Nasionale Krugerwildtuin in Suid-Afrika, en Gonarezhou Nasionale Park, Manjinjipanreservaat, en Malipati Safarigebied in Zimbabwe. Die gebied tussen Kruger en Gonarezhou, die Sengwe gemeenskapsgebied in Zimbabwe, en die Makulekestreek in Suid-Afrika sal ook deel uitmaak van die park.

'n Verklaring van voorneme vir die totstandkoming van die park is op 10 November 2000 geteken. Die park het toe bekend gestaan as die Gaza-Kruger-Gonarezhou-vredespark. In Oktober 2001 is die naam verander na die Groter Limpopo-vredespark.

Van die heinings tussen die parke is reeds verwyder om die diere in staat te stel om hul ou migrasieroetes te hervat wat voorheen deur landsgrense verhoed is.

In Oktober 2001 is die eerste 40 van 'n beplande 1000 olifante vanuit die Krugerwildtuin na die Limpopo Nasionale Park oorgeplaas. Dit het drie teeltroppe ingesluit. Dit het sowat drie jaar geneem om die oorplasing te voltooi.

In Maart 2004 is 'n nuwe grenspos, Giriyondo, tussen Suid-Afrika en Mosambiek geopen.

Sien ook[wysig | wysig bron]