Hannes Visser

Hannes Visser (17 November 1957, Roodepoort - ) is 'n Afrikaanse skrywer, digter en uitgewer. Sy debuutdigbundel, Die jaar toe pa..., is in 2019 deur Naledi Uitgewers uitgegee.

Jeug

Hy is in Roodepoort gebore en het 'n ouer broer, Herman. Sy vader was 'n sweiser op die myn en is in 1967, 'n week voor sy 42ste verjaarsdag, dood. Visser se moeder is drie jaar later weer getroud, waarna die gesin na Durban verhuis het toe Visser in Standerd 5 (Graad 7) was. Hulle het in 1974 teruggekeer na Roodepoort en hy het in 1975 aan Hoërskool Roodepoort gematrikuleer.

Loopbaan

Onderwys

Visser het 'n onderwysdiploma behaal en in Roodepoort, Gauteng sy eerste onderwyspos bekleë. Van 1976 tot 1979 behaal hy 'n Hoër Onderwysdiploma en meld in 1980 aan vir nasionale diensplig. Daarna volg twee jaar in die weermag. Hy verwerf intussen 'n verdere diploma in Spesiale Onderwys en begin in 1982 sy onderwysloopbaan in Roodepoort en trou met Manda. Hulle het twee kinders, Tanya (1984) en Anton (1986).

In 1992 bedank Visser uit die onderwys terwyl hy skoolhoof van Clarens Laerskool was. Sy bedanking volg op die uitsluiting van sy skool deur ander wit skole in die dorpe rondom Clarens omdat hy in 1992 'n bruin leerder tot sy skool toegelaat het. Skoolhoofde en beheerliggame van talle omliggende skole het geweier dat Laerskool Clarens aan sportbyeenkomste by hulle skole mag deelneem. Die beheerliggaam van die skool het Visser versoek om die bruin seun se ouers in te lig dat die skool hulle kind nie langer kan akkommodeer nie. Visser het geweier en uit die onderwys bedank.

Hy en sy gesin het in Junie 1992 na George verhuis waar hy vir die volgende 10 jaar verskeie beroepe gevolg het totdat hy in 2002 'n onderwyspos aanvaar het. Hy het in 2011 as skoolhoof van Laerskool van der Hoven, 'n landelike skool buite George, bedank en is as koerantredakteur van Oudtshoorn Courant aangestel. Hy het hierdie pos aan die einde van 2021 verlaat om hom voltyds op sy skryf- en digwerk en sy uitgewery, Turksvy Publikasies, toe te spits.

Redakteur, skrywer en uitgewer

In 2009 het hy saam met elf ander digters die bundel Boksemdais 2 uitgegee. Sewe van sy gedigte verskyn in 2017 in Nuwe Stemme 6, uitgegee deur NB Uitgewers. Hy het al verskeie pryse by die Bloemfonteinse skrywersvereniging se landwye kompetisies gewen. In 2013 het hy eersteprys in die kortverhaalafdeling gewen, sowel as tweedeprys in die poësie-afdeling. In 2017 wen hy tweedeprys in die prosa-afdeling – kortverhale, en in 2018 die eersteprys in die poësie-afdeling in dieselfde landwye kompetisie. Hy was tot 2021 redakteur van die Oudtshoorn Courant. Tans wy hy sy tyd voltyds aan sy skryfwerk en is die kommunikasiebeampte van die burgemeester van Oudtshoorn. 'n Heruitgawe van sy debuutdigbundel, Die jaar toe pa ... is in 2022 deur Turksvy Publikasies uitgegee. Resensies van dié bundel het reeds op Litnet, Versindaba, en Joan Hambidge se webjoernaal Woorde wat Weeg verskyn.

Visser het die uitgewery Turksvy Publikasies in 2020 saam met Marlene Malan, 'n joernalis en taalversorger, op die been gebring. Die uitgewery het in Februarie 2021 met 'n projek begin om 'n digbundel saam te stel met gedigte van gevestigde sowel as opkomende digters wat spesifiek oor die Covid-19-pandemie handel. Die bundel, Maskers en mure met 142 digters se werk, is in samewerking met die Klein Karoo Nasionale Kunstefees (KKNK) en met ondersteuning van die Wes-Kaapse departement van kultuursake en sport, ATKV, ABSA en Jannie Mouton Stigting uitgegee. Die bundel is in Junie 2021 deur die KKNK bekendgestel. Die digter Daniel Hugo was die hoofkeurder en mede-samesteller van die bundel saam met die digter, Francois de Jongh. Visser het 'n voorliefde vir kortverhale en het as deel van Turksvy Publikasies se bydrae tot die ontwikkeling van skrywers, 'n skryfkursus saamgestel wat op die kortverhaalkuns fokus. Visser het in Mei 2023 sy aandeel in Turksvy Publikasies aan sy vennoot oorgedra om hom voltyds aan skryfwerk te wy.

Visser se boek, Ligloop as skoene te maklik pas, het in 2022 verskyn. Dit is 'n lewensafrigtingshandleiding met riglyne oor die oplossing van daaglikse probleme en kommunikasie.

Sy debuutroman, Voorblad, verksyn in September 2023 by Naledi. Dit is 'n misdaadroman met 'n hoernalis as hoofkarakter. Visser werk tans aan 'n volgende roman met dieselfde karakters nadat lesers aangedui het dat hulle graag 'n opvolg wil lees.

Visser bied ook werksessies in kreatiewe skryfwerk en digkuns aan. Hy is ook 'n geakkrediteerde lewensaftrigter en Neuro-linguistiese programmering (NLP) -praktisyn. Hy tree op as motiveringspreker en doen voorlesings en gesprekke uit sy boeke.