Harry Gordon Selfridge

in Wikipedia, die vrye ensiklopedie
Harry Gordon Selfridge
Harry Gordon Selfridge omstreeks 1910
Gebore11 Januarie 1856
Ripon, Wisconsin
Vlag van Verenigde State van Amerika Verenigde State
Sterf8 Mei 1947
Putney, Londen
Vlag van Verenigde Koninkryk Verenigde Koninkryk
EggenootRosalie Buckingham
KindersHarry Gordon Selfridge, Jr.
Rosalie Selfridge (later Wiasemsky)
Beatrice Selfridge
Violette Selfridge

Harry Gordon Selfridge, Sr. (* 11 Januarie 1856; † 8 Mei 1947) was 'n Amerikaans-gebore Britse kleinhandelmagnaat wat bekendheid verwerf het as die stigter van die Londen-gebaseerde afdelingswinkel Selfridges wat hy dertig jaar lank bestuur het. Hy was een van die mees gerespekteerde en welvarendste kleinhandelmagnate in die Verenigde Koninkryk. Highcliffe-kasteel in Dorset was deel van sy besittings.

Selfridge, 'n boorling van Ripon in die deelstaat Wisconsin, het sy eerste geld as koerantseun verdien en die skool in die ouderdom van veertien verlaat toe hy by 'n bank in Jackson, Michigan aangestel is. Ná 'n reeks ander aanstellings het hy uiteindelik sy loopbaan by Marshall Field, 'n bekende afdelingswinkel in Chicago, begin. Hy was 25 jaar by dié onderneming werksaam en het in 1890 met Rose Buckingham getrou, 'n lid van 'n prominente familie in Chicago.

Nadat hy 'n reis na Londen onderneem het, het Selfridge in 1906 £400 000 in sy eie afdelingswinkel belê wat aan die westelike einde van Oxford-straat geleë was - in 'n buurt wat destyds nog as swak beskou is. Die afdelingswinkel het sy deure op 15 Maart 1909 vir die publiek geopen. Selfridge het tot en met sy aftrede in 1941 as bestuurder gefungeer, maar sou in sy latere lewe die grootste deel van sy fortuin verloor.

Selfridge is in 1947 in die ouderdom van 91 in sy klein woonstel in die Londense stadsdeel Putney oorlede en in 'n graf op die St Mark's-begraafplaas te Highcliffe, Dorset langs sy moeder en sy vrou begrawe.