Iran Air-vlug 655

in Wikipedia, die vrye ensiklopedie
Iran Air-vlug 655
Datum: 3 Julie 1988
Oorsaak: Burgerlike vliegtuig afgeskiet deur militêre missiel
Plek van ramp: Straat van Hormuz, Persiese Golf
Sterftes: 290
Beserings: 0
Vliegtuigtipe: Airbus A300 B2-203
Vliegtuig stertnommer: EP-IBU
Oorsprong: Mehrabad Internasionale Lughawe, Teheran, Iran
Bestemming: Doebai Internasionale Lughawe, Doebai, Verenigde Arabiese Emirate
Passasiers: 274
Bemanning: 16
Oorlewendes: 0
'n Tekening van die Irannese Airbus
Die kaart dui die vertrekpunt en die bestemming van die Irannese Airbus aan asook die posisie waar dit neergeskiet is. Die USS Vincennes het binne Iran se maritieme sone gevaar toe dit sy vuurpyle afgevuur het
Die USS Vincennes

Iran Air-vlug 655 (IR655) was 'n geskeduleerde vlug tussen Teheran en Doebai, Verenigde Arabiese Emirate, met 'n tussenlanding in die Irannese hawestad Bandar Abbas. Op 3 Julie 1988 is hierdie roete deur 'n Airbus A300B2-straler met die vlugkode EP-IBU bedien. Die passasiersvliegtuig is op die tweede deel van die roete oor die Persiese Golf naby die Irannese eiland Qeshm deur die Amerikaanse oorlogskip USS Vincennes (CG-49) met twee vuurpyle neergeskiet. Al 274 passasiers, waaronder 66 kinders en 38 buitelanders, en 16 bemanningslede is in die voorval dood.

Volgens 'n verklaring, wat deur die Amerikaanse regering uitgereik is, is die passasierstraler deur die USS Vincennes se bemanning valslik as 'n vyandelike F-14 Tomcat geïdentifiseer wat besig was om die skip aan te val. Die Irannese Airbus was egter juis besig om op te styg toe dit neergeskiet is. Die Irannese straler is deur die USS Vincennes se verkenningstelsels korrek as Airbus geïdentifiseer, en dit was net die skip se foutiewe elektroniese Aegis-gevegstelsel wat vals gegewens getoon het. Die bemanning het liewer op die gevegstelsel vertrou.

Die voorval het internasionale proteste uitgelok. Die Irannese regering het dit as 'n "barbaarse handeling" beskryf, en Teheran beweer steeds dat die straler opsetlik neergeskiet is ofskoon dit duidelik 'n siviele vliegtuig was. Tydens 'n toespraak by die Verenigde Nasies het die destydse Amerikaanse adjunkpresident George H.W. Bush die voorval as 'n handeling in oorlogstye verdedig. Volgens hom het die Amerikaanse bemanning in hul omstandighede korrek gereageer, en hy het dus geweier om Iran namens die Verenigde State om verskoning te vra.

Die voorval was besonder traumaties vir die Irannese regering en bevolking aangesien die land in Julie 1988 nog in 'n oorlog met sy buurland Irak gewikkel was. Iraniërs het sodoende onder die indruk gekom dat die VSA bereid was om tot die oorlog toe te tree en die land aan te val – 'n stryd wat vir Iran uitsigloos moes lyk.

Bronne[wysig | wysig bron]

  • International Court of Justice, (2001), "Case Concerning the Aerial Incident of July 3, 1988: v. 1: Islamic Republic of Iran v. United States of America", United Nations, ISBN 92-1-070845-8
  • Rochlin, Gene I. (1997). Trapped in the Net: The Unanticipated Consequences of Computerization. US: Princeton University Press. ISBN 0-691-01080-3.
  • Rogers, Sharon, (1992) Storm Center: The USS Vincennes and Iran Air Flight 655: A Personal Account of Tragedy and Terrorism, U.S. Naval Institute Press, ISBN 1-55750-727-9
  • Wise, Harold Lee (2007). Inside the Danger Zone: The U.S. Military in the Persian Gulf 1987–88. Annapolis: Naval Institute Press. ISBN 978-1-59114-970-5.