Verenigde Arabiese Emirate

in Wikipedia, die vrye ensiklopedie
Jump to navigation Jump to search
دولة الإمارات العربية المتحدة
Dawlat al-Imārāt al-'Arabīyah al-Muttaḥidah
Verenigde Arabiese Emirate
Vlag van die Verenigde Arabiese Emirate Embleem van die Verenigde Arabiese Emirate
Vlag Embleem
Volkslied: عيشي بلادي
Ishy Bilady
(Arabies vir: "Lank lewe my Nasie")
Ligging van die Verenigde Arabiese Emirate
Hoofstad Aboe Dhabi

24°28′N 54°22′O / 24.467°N 54.367°O / 24.467; 54.367

Grootste stad Doebai
Amptelike tale Arabies
Regering Federale absolute
monargie
Khalifa bin Zayed
Al Nahyan

Mohammed bin Rashid
Al Maktoum
Onafhanklikheid
2 Desember 1971
Oppervlakte
 - Totaal
 
 - Water (%)
 
83 600 km2  (114de)
32 300 myl2
feitlik niks
Bevolking
 - 2016-skatting
 - 2005-sensus
 - Digtheid
 
9 269 612[1] (94ste)
4 106 427
99 / km2 (110de)
256,4 / myl2
BBP (KKP)
 - Totaal
 - Per capita
2018-skatting

$729,043 miljard[2] (32ste)
$69 896[2] (7de)

BBP (nominaal)
 - Totaal
 - Per capita
2018-skatting

$400,902 miljard[2] (28ste)
$38 436[2] (19de)

MOI (2015) Green Arrow Up Darker.svg 0,840[3] (42ste)  –  baie hoog
Gini (2008) 36[4] –  medium
Geldeenheid Dirham (AED)
Tydsone
 - Somertyd
GST (UTC+4)
nie toegepas nie (UTC+4)
Internet-TLD .ae, امارات.
Skakelkode +971

Die Verenigde Arabiese Emirate (Arabies: دولة الإمارات العربية المتحدة‎, Dawlat al-Imārāt al-'Arabīyah al-Muttaḥidah; dikwels afgekort tot VAE), in die omgangstaal ook net Emirate (الإمارات‎, al-Imārāt) genoem, is 'n land in die Midde-Ooste en Wes-Asië. Die Verenigde Arabiese Emirate (VAE) is 'n federasie van sewe emirate – Aboe Dhabi (die grootste), Ajman, Doebai, Fujairah, Ras al-Khaimah, Sharjah en Umm al-Quwain – waarvan elkeen sy eie spesifieke karakter het.

Nasa-Satellietbeeld van die Verenigde Arabiese Emirate

Ruolie is die primêre bron van rykdom in die VAE, maar die emirate is besig om hul ekonomieë te diversifiseer. So word onder meer die toerisme- en handelsbedryf massief uitgebrei. Die ekonomiese welvaart het daartoe gelei dat die ou tradisies van die Arabiese kultuur in die VAE met 'n hipermoderne infrastruktuur en 'n kosmopolitiese leefstyl verbind word. Dit het ook baie buitelandse spesialiste en ander werknemers na die VAE gelok sodat die federasie tans 'n vinnige bevolkingsgroei van byna drie persent (soos in 2013) ervaar. Net sowat 'n vyfde van die meer as vyf miljoen Emiratis, soos die inwoners genoem word, is plaaslik gebore.

Die VAE het in die laat 20ste en 21ste eeu tot een van die mees dinamiese en hoogontwikkelde ekonomieë ter wêreld ontwikkel en soms word na die federasie as die "Switserland van die Nabye Ooste" verwys.[5] In elk geval word die VAE met ambisieuse projekte en superlatiewe verbind, waaronder die hoogste gebou ter wêreld, die Burj Khalifa, die grootste moskee met plek vir 70 000 gelowiges, die langste voloutomatiese moltreinlyne en kunsmatige eilande soos The World en die palmeilande Palm Jumeirah en Jebel Ali.

Doebai en Aboe Dhabi, die twee grootste stede, het tot globale metropole en internasionale lugvaartsentrums ontwikkel, terwyl Emirates, 'n Doebai-gebaseerde lugredery, tot een van die grootstes wêreldwyd gegroei het.

Geografie[wysig | wysig bron]

Die Verenigde Arabiese Emirate grens in die noordweste aan die Persiese Golf, in die noorde aan die Straat van Hormuz, in die noordooste aan die Golf van Oman, in die ooste aan Oman, asook in die suide en suidweste aan Saoedi-Arabië. Verder noordwes is Bahrein en Katar en in die noorde is Iran geleë. Die emirate se geografie word in die suide gekenmerk deur die Arabiese woestyn.

Geologie[wysig | wysig bron]

Die Arabiese Plaat

Die Arabiese Skiereiland (wat in die geologiese konteks ook Arabiese Plaat genoem word) het oorspronklik deel gevorm van die Afrika-vasteland waarvan dit eers in die laat tersiêr (sowat 50 miljoen jaar gelede) en vroeë kwartêr geskei is. Tektoniese aktiwiteit in die aardkors het die Groot Skeurvallei gevorm, 'n slenkdal wat vanuit die Middellandse Seegebied in 'n suidelike rigting deur Ethiopië loop en verder suidwaarts tot in Zimbabwe strek en die Arabiese Skiereiland van die vasteland van Afrika skei. In die slenkdal tussen die Afrikavasteland en die Arabiese Plaat het die Rooisee gevorm.

Nadat die westelike randgebiede van die skiereiland deur verdere tektoniese prosesse opwaarts gedruk is, het die hele plaat in 'n oostelike rigting begin beweeg. Hierdie proses, waarby die Arabiese teen die Eurasiese Plaat stoot en die Anatolies-Iranse Plooigebergte ontstaan het, duur steeds voort en veroorsaak onder meer verwoestende aardbewings in Iran. Tans beweeg die Arabiese Plaat met 'n snelheid van tussen twee en drie sentimeter per jaar in 'n noordoostelike rigting en daar word verwag dat die Persiese Golf oor vyf miljoen jaar nie meer sal bestaan nie.

Emirate[wysig | wysig bron]

Ligging van die sewe emirate
Vlag Emiraat Hoofstad Bevolking[6] Oppervlakte
2008 % (km²) (myl²) %
Flag of Abu Dhabi.svg Aboe Dhabi Aboe Dhabi 1 548 655 31,2% 67 340 26 000 86,7%
Flag of Ajman.svg Ajman Ajman 372 923 7,5% 259 100 0,3%
Flag of Dubai.svg Doebai Doebai 1 770 533 35,6% 3 885 1 500 5,0%
Flag of Fujairah (1952–1972).svg Fujairah Fujairah 137 940 2,9% 1 165 450 1,5%
Flag of Sharjah.svg Ras al-Khaimah Ras al-Khaimah 171 903 3,4% 1 684 650 2,2%
Flag of Sharjah.svg Sharjah Sharjah 895 252 18,0% 2 590 1 000 3,3%
Flag of Umm al-Qaiwain.svg Umm al-Quwain Umm al-Quwain 69 936 1,4% 777 300 1%
Flag of the United Arab Emirates.svg VAE Aboe Dhabi 4 967 142 100% 77 700 30 000 100%

Politiek[wysig | wysig bron]

Zayed bin Sultan Al Nahyan was die eerste president van die Verenigde Arabiese Emirate en word as vader van die nasie beskou
Khalifa bin Zayed Al Nahyan, tweede en huidige president van die VAE

Die Duitse Departement van Buitelandse Sake het die politieke bedeling in die VAE, 'n federale absolute monargie, in 2007 as 'n "patriargaliese presidensiële stelsel met tradisionele konsultasiemeganismes" beskryf.[7] Die VAE se president word deur die sewe eerste ministers uit die geledere van die sewe emirs of premiers van die emirate gekies. Daar is geen politieke partye of algemene verkiesings volgens westerse parlementêre modelle nie.

Die parlement – die Federale Nasionale Raad (FNR) – het 40 afgevaardigdes waarvan die helfte deur die sewe heersers of premiers benoem en die ander helfte indirek verkies word. Ofskoon die FNR bevoegd is om wetsbesluite en verordeninge asook die bedrywighede van departemente en ministers te hersien, tree dit in die praktyk eerder raadgewend op. Die VAE se grondwet maak voorsiening vir die skeiding van magte, maar dit is die hoogste federale liggaam, die Hoogste Raad van die sewe heersers, waar die wetgewende gesag in die praktyk gesetel is. Aangesien hulle ook die uitvoerende gesag het en die staatshoof verkies wat op sy beurt die regering benoem, is die mag in die Hoogste Raad gekonsentreer.

Die huidige president van die Verenigde Arabiese Emirate is sedert 2004 Khalifa bin Zayed Al Nahyan, wat ook as emir van Aboe Dhabi dien. Die eerste minister is Mohammed bin Rashid Al Maktoum, gelyktydig heerser van Doebai.

Ekonomie[wysig | wysig bron]

Hoofkenmerke[wysig | wysig bron]

Al-Ain is een van min plekke in die VAE waar landbou beoefen kan word
Etihad Airways, vlagdraer van die Verenigde Arabiese Emirate
Emirates Airline is een van die grootste lugrederye ter wêreld

Die Verenigde Arabiese Emirate is die agtste grootste ruolieprodusent en beskik oor die wêreld se sesde grootste herwinbare ruolie- en die sewende grootste aardgasreserwes. Met 'n per capita-inkomste van sowat VSA-$ 50 000, bestendige ekonomiese groei en internasionale beleggingsbates ter waarde van enkele honderd miljard VSA-$ word die Emirate, wat as 'n ontwikkelende hoër-inkomste-ekonomie geklassifiseer word, van die welvarendste lande en grootste internasionale beleggers gereken. Die VAE se ekonomiese vryemarkbeleid plaas min beperkings op die privaat sektor, internasionale handel en kapitaalbewegings.

Volgens die Economist Intelligence Unit het die Emiratiese ekonomie in 2012 met drie persent gegroei, terwyl vir 2013 – afhangende van die beweging in die olieprys – tussen drie en vier persent voorspel word. Inflasie is onder beheer met minder as twee persent (0,9 persent in 2011 en 0,7 persent in 2012). Die relatief hoë olieprys verseker 'n hoë staatsinkomste en stabiele ekonomie groei. Die Emirate is besig om hul olieproduksie van sowat drie miljoen vate per dag op te stoot tot die maksimum van 3,5 miljoen vate.

Die VAE se ekonomiese beleid, wat veral deur die emiraat Aboe Dhabi finansieel gesteun word, is desondanks gemik op die diversifisering van die ekonomiese basis. Nuwe sleutelsektore sluit logistiek, handel, die organisering van handelskoue, toerisme en finansiële dienste (veral met betrekking tot Doebai) in, maar ook kapitaal- en energieintensiewe nywerheidsbedrywe soos staal- en aluminiumvervaardiging en petrochemie en hoë-tegnologiesektore (hernubare energie en die vervaardiging van mikroskyfies). Daarnaas speel ook lugvaart 'n belangrike rol en lewer intussen byna 'n vyfde van die VAE se bruto binnelandse produk op. Doebai en Aboe Dhabi het vanweë hul gunstige geografiese ligging en strukturele voordele tot twee van die wêreld se voorste lugvaartsentrums ontwikkel: Die Aboe Dhabi Internasionale Lughawe en die Doebai Internasionale Lughawe.

Energiebedryf[wysig | wysig bron]

'n Tradisionele huis in Doebai met windtorings, barjeel genoem

Die VAE is besig om hul energievoorsiening te diversifiseer, veral omdat die kragverbruik met jaarliks sewe persent skerp styging toon. Vanweë die relatief lae kragkoste, maar ook omdat die baie warm en dikwels vogtige klimaat lugreëling in geboue noodsaaklik maak, het die per capita-elektrisiteitsverbruik reeds 'n internasionale rekordvlak van jaarliks 12 000 kilowatt-ure bereik.

Naas konvensionele gasturbine-kragsentrales (wat dikwels as komplekse met meerdere kragsentrales bedryf en met seewaterontsoutingsaanlegte gekombineer word, soos onder meer in Al Taweelah in Aboe Dhabi en in Djabal Ali in Doebai) en kernaanlegte (vanaf 2017) word ook steeds meer in hernubare energiebronne belê. Duursame energiebronne sal omstreeks 2020 na verwagting in tenminste sewe persent van die plaaslike energiebehoefte voorsien. 'n Belangrike internasionale agentskap vir hernubare energiebronne, die Verenigde Nasies se International Renewable Energy Agency (IRENA), is in Aboe Dhabi gesetel.

'n Suid-Koreaanse konsortium onder leiding van die Korea Electric Power Corporation (KEPCO) het in 2009 opdrag gekry om vier APR-1400-kernreaktors (elkeen met 'n kraglewering van 1 400 MWe) ter waarde van VSA-$ 30 miljard op te rig. Boubedrywighede vir die eerste twee reaktors van die Barākah-aanleg in die uiterste weste van Aboe Dhabi het op 17 Maart 2011 begin. Die kernaanlegte sal in 'n kwart van die Emirate se kragbehoefte voorsien en na verwagting tussen 2017 en 2020 voltooi en in 2021 in bedryf gestel word.[8]

Demografie[wysig | wysig bron]

'n Tradisionele souk in Deira, Doebai

Meer as 50 persent van die inwoners is nie in die land gebore nie (in die omgang "expats" genoem). Weens die werkgeleenthede daar woon meer as twee miljoen mense van Suid-Asië soos Indiërs en Pakistanis in die Verenigde Arabiese Emirate; so ook baie duisende Suid-Afrikaners.

Godsdiens[wysig | wysig bron]

Meer as 70 persent van die land se inwoners is Moslems terwyl ongeveer tussen vyf en tien persent Rooms-Katolieke is wat van die Filippyne (wat hoofsaaklik Katolieke is) geïmmigreer het. 'n Verdere tien persent is Hindoes wat van Suid-Asië geïmmigreer het. 'n Groot mate van godsdiensvryheid bestaan; tot die mate dat Doebai 'n kerk spesifiek gerig op Suid-Afrikaners, die 'Afrikaanse Kerk van Doebai', huisves.

Sport[wysig | wysig bron]

Tradisionele valkery in die woestyn

Formule Een is die gewildste toeskouersport in die Verenigde Arabiese Emirate. Die Aboe Dhabi Grand Prix vorm sedert 2009 deel van die Formule Een-kalender en word op die Yas Marina-renbaan op die Yas-eiland beslis. Ander gewilde sportsoorte sluit in kameelwedrenne, valkery, uithouritte en tennis.[9]

Sokker is die gewildste sportsoort in die Verenigde Arabiese Emirate. Die nasionale sokkerspan het tot dusver een keer vir die FIFA Sokker-Wêreldbeker kwalifiseer en aan die FIFA Sokker-Wêreldbekertoernooi in 1990 deelgeneem, saam met Egipte. Dit was die derde agtereenvolgende toernooi waartydens twee Arabiese nasionale sokkerspanne kon deelneem, ná die FIFA Sokker-Wêreldbekertoernooi in 1982 met Algerië en Koeweit, gevolg deur die FIFA Sokker-Wêreldbekertoernooi in 1986 met Algerië, Irak en Marokko. Na die Asiatiese Beker van 1996 sal die VAE die Asiatiese Beker in 2019 aanbied.

Krieket is een van die gewildste sportsoorte in die Verenigde Arabiese Emirate, veral te danke aan die uitgewekene bevolking van die lande in Suid-Asië, die Verenigde Koninkryk en Australië. Doebai huisves kantore van die Internasionale Krieketraad, terwyl die hoofkantoor steeds in Londen se Lord’s-krieketveld gesetel is. Die Verenigde Arabiese Emirate nasionale krieketspan kon tot dusver twee keer vir die Krieketwêreldbeker kwalifiseer en het aan dié toernooie van 1996 en 2015 deelgeneem, maar het nie tot die uitklopfase deurgedring nie.

Verwysings[wysig | wysig bron]

  1. (en) "World Population Prospects: The 2017 Revision". ESA.UN.org (custom data acquired via website). United Nations Department of Economic and Social Affairs, Population Division. Besoek op 18 Mei 2018. 
  2. 2,0 2,1 2,2 2,3 (en) "Verenigde Arabiese Emirate". Internasionale Monetêre Fonds. Besoek op 18 Mei 2018. 
  3. (en) "2016 Human Development Report" (PDF). United Nations Development Programme. 2016. Besoek op 18 Mei 2018. 
  4. (en) "Gini index". Wêreldbank. Besoek op 14 Augustus 2014. 
  5. (de) Dieter Matthew Schlesinger en Gabriele Katharina Scheuring (reds.): Vereinigte Arabische Emirate. Wirtschaft, kultur und geographische Strukturen. WRU-Berichte, Heft 34. Materialien und Forschungsberichte aus dem Lehrstuhl für Wirtschaftsgeographie der Universität München. München 2008, bl. 1. Teks aanlyn beskikbaar: VAE
  6. (en) "Census 2008". Ministry of Economy and Planning, Government of the United Arab Emirates. 2008. Besoek op 18 Mei 2018. 
  7. (de) Sabine Wimberger: Dubai, Reiseziel der Zukunft. Eine kritische Betrachtung der Tourismusentwicklung aus ökonomischer, gesellschaftlicher und ökologischer Sicht. Proefskrif. Hamburg: Diplomica Verlag 2008, bl. 5
  8. (de) Germany Trade and Invest, 30 April 2012: Aktuelle Trends aus den Vereinigten Arabischen Emiraten. Besoek op 1 Desember 2013
  9. (en) "UAE Sports". Uae.gov.ae. Geargiveer vanaf die oorspronklike op 11 Junie 2008. 

Eksterne skakels[wysig | wysig bron]


 
Lande en gebiede in Asië

Lande: Afghanistan | Armenië2 | Azerbeidjan1 | Bahrein | Bangladesj | Bhoetan | Broenei | Egipte | Filippyne | Georgië1 | Indië | Indonesië | Irak | Iran | Israel | Japan | Jemen | Jordanië | Kambodja | Kasakstan1 | Katar | Kirgisië | Koeweit | Laos | Libanon | Maledive | Maleisië | Mianmar | Mongolië | Nepal | Noord-Korea | Oesbekistan | Oman | Oos-Timor | Pakistan | Rusland1 | Saoedi-Arabië | Singapoer | Siprus2 | Sirië | Volksrepubliek China | Sri Lanka | Suid-Korea | Tadjikistan | Thailand | Turkmenistan | Turkye1 | Verenigde Arabiese Emirate | Viëtnam

Omstrede gebiede: Abchasië - Nagorno-Karabakh - Noord-Siprus - Palestina - Republiek China (Taiwan) - Suid-Ossetië

Afhanklike gebiede: Australië: Kerseiland - Kokoseilande | Verenigde Koninkryk: Akrotiri en Dhekelië2 - Britse Indiese Oseaangebied | Volksrepubliek China: Hongkong - Macau

1. Land deels in Europa. 2. Geografies in Asië, maar gereeld beskou as deel van Europa a.g.v. kulturele en historiese oorwegings.

Lande van: Afrika - Europa - Noord-Amerika - Oseanië - Suid-Amerika