Jane Seymour

in Wikipedia, die vrye ensiklopedie
Hierdie artikel handel oor die Engelse koningin-gemaal, die derde vrou van koning Hendrik VIII.
Jane Seymour
Koningin-gemaal van Engeland

Eggenoot Hendrik VIII van Engeland
Tydperk 30 Mei 1536 – 24 Oktober 1537
Voorganger Anna Boleyn
Opvolger Anna van Kleef
Huis Huis van Tudor
Kinders Edward VI
Gebore Omstreeks 1508
Oorlede 24 Oktober 1537
Handtekening

Jane Seymour (omstreeks 1508 – 24 Oktober 1537) was die derde vrou van koning Hendrik VIII van Engeland. Sy en Hendrik is op 30 Mei 1536 getroud, elf dae ná sy tweede vrou, Anna Boleyn, se teregstelling op aanklagte van owerspel, bloedskande en hoogverraad. Jane is weens komplikasies dood minder as twee weke ná die geboorte van haar enigste kind, ’n seun wat ná Hendrik se dood regeer het as Edward VI. Omdat sy die enigste van Hendrik se ses vroue was wat vir hom ’n manlike erfgenaam gegee het, is sy die enigste een wat ’n koningin se begrafnis gekry het en langs hom begrawe is.

Vroeë lewe[wysig | wysig bron]

Jane Seymour is in Wiltshire gebore as die dogter van sir John Seymour (1474–1536) en sy vrou, Margery. Deur haar oupa aan moederskant was sy ’n afstammeling van koning Edward III.[1] Sy en Hendrik was dus verlangse neef en niggie. Sy was ook ’n kleinniggie van Anna Boleyn.

Haar geboortedatum word gewoonlik aangegee as 1509 of selfs 1510, maar op haar begrafnis het 29 vroue in gelid geloop,[2] ’n aanduiding dat sy 29 jaar oud was met haar dood en dus moontlik in 1508 of 1507 gebore is.

Jane was nie so goed opgevoed soos die koning se eerste twee vroue nie. Sy kon ’n bietjie lees en skryf, maar was beter met naaldwerk en huishouding, wat as noodsaakliker vir vroue van dié tyd beskou is.[3] Sy het in 1532 ’n diensmeisie geword van die koning se eerste vrou, Catharina van Aragon, en daarna van sy tweede vrou, Anna Boleyn. Die eerste melding van die koning se belangstelling in Jane was vroeg in 1536, kort voor die dood van Catherina. Hulle het daarna ’n verhouding gehad terwyl die koning nog met Anna Boleyn getroud was.

Koningin[wysig | wysig bron]

Jane Seymour se wapen as koningin.

Op 30 Mei 1536, elf dae ná Anna se teregstelling op aanklagte van owerspel, bloedskande en hoogverraad, is die koning met Jane getroud. Sy is nooit gekroon nie weens die uitbreek van builepes in Londen, waar die kroning sou plaasvind, maar sy is op 4 Junie amptelik as koningin-gemaal verklaar.

As koningin was die Katolieke Jane streng en formeel en polities onbetrokke. Sy het probeer om Hendrik se oudste dogter, Maria, weer op die lys van aanspraakmakers op die troon te kry ná enige van haar eie kinders en om haar na die hof te laat terugkeer. Hoewel Maria se aanspraak op die troon nie toe herstel is nie, het sy weer met haar pa versoen geraak.

Die vroue van Hendrik VIII
Catharina van Aragon
Anna Boleyn
Jane Seymour
Anna van Kleef
Catharina Howard
Catharina Parr

Vroeg in 1537 het Jane swanger geraak en op 12 Oktober het sy die lewe geskenk aan Edward. Die geboorte was moeilik; Jane was twee dae en drie nagte in kraam, waarskynlik weens die posisie van die baba in die baarmoeder.[4] Sy is op 24 Oktober 1537 oorlede. Dit is onseker wat die presiese oorsaak van haar dood was. Sy is op 12 November 1537 in die Sint George-kapel by Windsor-kasteel begrawe.

Ná haar dood het Hendrik drie maande lank swart gedra en hy is eers drie jaar later weer getroud, hoewel onderhandelings vir ’n nuwe bruid net ná haar dood begin het.

Verwysings[wysig | wysig bron]

  1. Elizabeth Norton. Jane Seymour: Henry VIII's True Love, Amberley Publishing, Mei 15, 2009. pg 8. Google eBook
  2. Weir, Alison. The Six Wives of Henry VIII.
  3. Brown, Meg Lota en Kari Boyd McBride. Women's roles in the Renaissance. Greenwood Publishing, bl. 244
  4. "The death of Jane Seymour – a Midwife's view" (in Engels). Tudorstuff. 21 Maart 2009. Geargiveer vanaf die oorspronklike op 9 Oktober 2019. Besoek op 24 Oktober 2010.

Eksterne skakels[wysig | wysig bron]


Hierdie artikel is vertaal uit die Engelse Wikipedia