Jannie Erasmus
| Dr. Jannie Erasmus | |
| Naam | Jan Andries Erasmus |
|---|---|
| Geboorte | 21 Junie 1974 Carolina, Mpumalanga |
| Kerkverband | Gereformeerd |
| Gemeente(s) | Windhoek-Suid, 2000–2003 Germiston, 2003–2008 Odendaalsrus, 2008–hede |
| Jare aktief | 2000–hede |
| Kweekskool | Potchefstroom |
Dr. Jan Andries Erasmus (gebore Carolina, 21 Junie 1974) is 'n predikant in die Gereformeerde Kerke in Suid-Afrika.
Jannie Erasmus is in 1974 op Carolina gebore as die eerste van die twee kinders van Rassie en Joey Erasmus. Aan die einde van sy st. 4-jaar verhuis hulle na Bethal, waar hy in 1992 aan die Hoërskool Hoogenhout matrikuleer. Hy begin sy teologiese studies in 1993 aan die destydse PU vir CHO en voltooi dit in 1999.
In 2000 aanvaar hy sy eerste beroep, na die Gereformeerde kerk Windhoek-Suid, waar hy ook ingevolge ’n bedieningsooreenkoms die Gereformeerde kerk Okahandja bedien.
Hy en Hannelie (née Opperman) het mekaar op universiteit ontmoet en is in Desember 2001 in die kerkgebou van Potchefstroom-Suid getroud. Sy is ’n apteker van beroep. ’n Jaar nadat sy by hom in Windhoek aangesluit het, aanvaar hulle ’n beroep na die Gereformeerde kerk Germiston. In die tyd in Germiston het hy sy Ph.D.-graad in Homiletiek (Preekkunde) voltooi. Sedert hulle in 2008 ’n beroep na die Gereformeerde kerk Odendaalsrus aanvaar het, is hulle Vrystaters in murg en been.
Soos uit sy studieveld opgemerk kan word, is sy grootste vreugde om mense met die Woord van die Here (veral deur prediking en Bybelstudie) toe te rus. Op ’n meer persoonlike vlak is hy en Hannelie baie lief vir die natuur. Hy neem graag natuurfoto’s, kyk voëls en ry bergfiets. Hulle is baie lief om as gesin in die Drakensberge en die Krugerwildtuin te gaan uitkamp. Hulle het twee dogters, Mari (14) en Jolene (10).
Bron[wysig | wysig bron]
- E-posonderhoud gevoer op 17 Junie 2020.