Gereformeerde kerk Okahandja

in Wikipedia, die vrye ensiklopedie
Jump to navigation Jump to search
Die Gereformeerde kerk Okahandja, 2016.
Ds. Peter Hattingh, die predikant van 2017 af.
Die latere Gereformeerde kerk Okahandja, toe dit nog die saalkerk van die NG gemeente Okahandja was.
Predikante van Klassis Etosha in sitting op Okahandja in September 2017. Voor: Di. Johan Dunn (Keetmanshoop en Mariental), Peter Hattingh (Okahandja) en Janré van Jaarsveld (Tsumeb). Agter: Di. Henning Venter (Windhoek), Jeremia Moletsane (Sanveld), Werner van den Heever (Gobabis), dr. Callie Opperman (Windhoek-Suid) en ds. Jan van der Walt (Otjiwarongo). Die gemeentes Grootfontein, Karasburg en Walvisbaai/Swakopmund was vakant (in afwagting van hul nuwe predikant se koms uit Suid-Afrika, terwyl Hentiesbaai bedien is deur die emerituspredikant ds. Jan du Plessis.
Die kansel in Okahandja se Gereformeerde kerk.

Die Gereformeerde kerk Okahandja is ’n Gereformeerde gemeente op die Namibiese dorp Okahandja. Dit is tans (2015) die 13de oudste gemeente van die Gereformeerde Kerk in Namibië.

Agtergrond[wysig | wysig bron]

Okahandja is in werklikheid die jongste van drie Gereformeerde kerke wat met die jare gestig is binne die huidige gemeentegrense wat, buiten die gelyknamige distrik, ook die distrikte Usakos, Karibib, en Omaruru insluit. Die Gereformeerde kerk Usakos is in 1953 gestig, maar het in 1960 ontbind nadat die afstigting van die Gereformeerde kerk Walvisbaai in 1956 dié gemeente se selfstandige voortbestaan onmoontlik gemaak het. En op Omaruru en Karibib het van 1972 tot 1982 ’n gemeente Erongo bestaan het.

Die huidige Gereformeerde kerk Okahandja het ontstaan as ’n wyk van Windhoek, sowat 70 km suid van hier, toe ds. A.G.C. Yssel in die laat 1960's en vroeë 1970's Doppers in die omgewing uitgesnuffel en hulle saamgesnoer het in ’n wyk van sy gemeente, waar hy gestaan het van 1968 tot sy aftrede in 1988. Een maal per maand het die Windhoekse kerk vir dienste op Okahandja gesorg.

Reeds in 1974 was dit moontlik vir die wyk om met Windhoek se hulp die ou kerkgebou van die NG gemeente Okahandja (gestig in 1946) vir R28 000 te koop. Die wyk kon die skuld grootliks self delg en die uitstaande saldo het as bruidskat gekom. Hierdie gebou is vir die eerste keer op 20 Julie 1929 in gebruik geneem deur die NG Kerk toe administrateur A.J. Werth as hoofspreker opgetree het. Die teks op die gedenksteen is Ps. 99:2. Op 18 September 1976 het die Gereformeerde Kerk die gebou amptelik in gebruik geneem toe oudl. Mostert, wat in 1946 in dieselfde gebou gedoop is, die gedenksteen onthul het. Die teksvers op die steen is Ps. 105:4.

Stigting[wysig | wysig bron]

Die volgende stap was afstigting en wel op 14 Oktober 1978, toe Okahandja in kombinasie gegaan het met die moedergemeente. Die gemeente het einde 2001 82 belydende lidmate gehad, maar teen einde 2014 het dit tot 163 toegeneem nadat dit einde 2012 by 174 gaan draai het. 'n Moontlike verklaring vir dié toeneming sedert 2001 is dat reeds in 2012 sowat 600 mense daagliks tussen Okahandja en Windhoek gependel het omdat die huispryse in die hoofstad vir baie onbekostigbaar geword het.[1]

Predikante[wysig | wysig bron]

  1. Vogel, Willem, 1982–1985
  2. Venter, Tjaard Machiel, 1985–1992
  3. Momberg, Hendrik Lodewyk Jacobus, 1995–1998
  4. Meyer, Lukas Marten, 2003–2004 (in kombinasie met Windhoek-Suid; verlaat die bediening)
  5. De Klerk, dr. Theunis Christiaan, 2005 – 2016 (aanvaar sy emeritaat)
  6. Hattingh, P.J. (Peter), 2017 – hede

Bronne[wysig | wysig bron]

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
  • (en) Potgieter, D.J. (hoofred.) Standard Encyclopaedia of Southern Africa. Cape Town: Nasionale Opvoedkundige Uitgewery Ltd., 1973.
  • (en) Raper, P.E. 1987. Dictionary of South African Place Names. Johannesburg: Lowry Publishers.
  • (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
  • (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
  • (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
  • (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Verwysings[wysig | wysig bron]

  1. (af) Okahandja 'n eiendomsparadys, Republikein, 20 April 2012. URL besoek op 1 Desember 2015.

Sien ook[wysig | wysig bron]