Jesse Owens

in Wikipedia, die vrye ensiklopedie
Spring na: navigasie, soek
Jesse Owens
Jesse Owens.jpg
Doopnaam: James Cleveland Owens
Geboorte: 12 September 1913; Oakville, Alabama
Afsterwe: 31 Maart 1980; Tucson, Arizona
Besonderse prestasies:
Goud 100 m (1936 Olimpiese Spele)

Goud 200 m (1936 Olimpiese Spele)
Goud 4x100 aflos (1936 Olimpiese Spele)
Goud verspring (1936 Olimpiese Spele)
- Amerikaanse 100 m-kampioen 100 m (1936)
- Amerikaanse verspringkampioen (buitemuurs) - (1933, 1934, 1936)
- Amerikaanse verspringkampioen (binnemuurs) - (1934, 1935)
- NCAA-kampioen, 100 m (1942, 1943)
- NCAA-kampioen, 200 m (1941, 1942)
- NCAA-kampioen, 220 jaart hekkies (1935, 1936)
- NCAA-verspringkampioen (1941, 1942)

Jesse Owens (12 September 1913 - 31 Maart 1980) was 'n Amerikaanse atleet wat vier goue medaljes by die Berlynse Olimpiese Spele in 1936 gewen het.

Owens is gebore as James Cleveland Owens aan Henry en Emma Owens en was die jongste van tien kinders. Hy kry sy bynaam "Jesse" by een van sy onderwysers op sy laerskool, toe dié hom verkeerd verstaan toe hy sy naam as "J.C. Owens" opgee. Owens se sportonderwyser, Charles Riley, het aangebied om hom af te rig, maar dat was nie dadelik moontlik nie, siende dat Jesse smiddags by 'n kruidernierswinkel moes werk om geld vir sy gesin bymekaar te skraap. Riley het mettertyd aangebied om Owens soggens, voor skool, af te rig en Owens het ingestem.

Hy het in 1933 vir die eerste keer nasionale aandag getrek as 'n leerling van die hoërskool in Cleveland: tydens die interhoër in Chicago het hy die wêreldrekord vir die 100-jaart (91m) naelloop geëwenaar en 7.56 m ver gespring.[1] Talle universiteite het hom genader, maar hy het uiteindelik op die Staatsuniversiteit van Ohio besluit, na sy pa 'n werk gevind het om die gesin in Jesse se afwesigheid te ondersteun.

Alhoewel hy 'n bekende en suksesvolle atleet was, is hy nie toegelaat om op die kampus te woon nie; hy moes saam met ander swart studente ander blyplek soek en kon slegs in "swart" restaurante eet. Hy het ook nie 'n beurs kon kry nie en moes dus deeltyds werk om sy studies te betaal.

Owens het sy indrukwekkendste prestasie in 1935 behaal, toe hy tydens 'n wedstryd in Ann Arbor, Michigan, drie wêreldrekords binne 45 minute gebreek het en een geëwenaar het. Hy het die wêreldrekord vir die 100 jaar naelloop geëwenaar (9,4 sek.) en nuwe rekords opgestel vir verspring (8,13 m), 220-jaart (201,2 m) naelloop (20,7 sek.) en die 220-jaart hekkies. Sy verspringrekord sou vir 25 jaar ongebroke bly.

In 1936 het Owens die Verenigde State in die Olimpiese Spele in Berlyn verteenwoordig. Adolf Hitler het die geleentheid aangegryp as propagandamiddel vir sy nasionaal-sosialistiese politiek en die nadruk gelê op die prestasies van die sogenoemde "Ariese" atlete. Op die eerste dag van die Spele het Hitler slegs Duitse wenners se hand geskud. Beamptes van die Olimpiese Spele het egter daarop aangedring dat Hitler óf al die wenners se hande skud óf niemand se hande skud nie. Hitler het die twee opsie gekies.[2][3] Owens het nie hierdeur afgesnou gevoel nie, maar was wel teleurgesteld dat hy nie uitgenooi is om president Franklin D. Roosevelt se hand te skud by die Wit Huis nie.

In Berlyn het Owens goue medaljes vir die 100 m, 200 m, verspring en 4x100 m aflos verower.

Ná die Spele wou Owens terug huis toe keer, waar 'n aantal kommersiële aanbiedings op hom gewag het. Amerikaanse atletiekamptenare was woedend en Owens se atletiekloopbaan is daar en dan beëindig. Terug in Amerika het Owens atletiek gebruik om mense te vermaak, deur byvoorbeeld teen resiesperde te hardloop. Finansieel het dit egter swaar gegaan en is hy uiteindelik bankrot verklaar. Hy het egter daarna 'n werk as welwillendheidsambassadeur vir die Verenigde State gekry en bedrywe soos die Ford Motormaatskappy en die Olimpiese Komitee van die Verenigde State toegespreek. Hy het in 1980 gesterf aan longkanker.

Verwysings[wysig]

  1. Jesse Owens: Track & Field Legend: Biography”. URL besoek op 2008-01-06.
  2. Hyde Flippo, The 1936 Berlin Olympics: Hitler and Jesse Owens German Myth 10 from german.about.com
  3. Rick Shenkman, Adolf Hitler, Jesse Owens and the Olympics Myth of 1936 February 13, 2002 from History News Network (article excerpted from Rick Shenkman's Legends, Lies and Cherished Myths of American History. Publisher: William Morrow & Co; 1st ed edition (November 1988) ISBN 0-688-06580-5)