Johannes de Villiers

Johannes de Villiers is ’n Afrikaanse skrywer oor bewustelikheid (“mindfulness”), meditasie en positiewe sielkunde.

Lewe en werk

Johannes Bertus de Villiers is op 5 Julie 1976 gebore. Hy het op Beaufort-Wes en die Paarl groot geword. Vanaf 1996 studeer hy aan die Universiteit van Stellenbosch, waar hy in 1998–99 B.A.- en B.A. Honneurs-grade in Joernalistiek en in 2008 'n M.A.-graad in Antieke Studies verwerf. Hy verwerf ook in 2000 ’n honneursgraad in Frans aan die Universiteit van die Vrystaat. Hy werk sedert 2001 as joernalis, eers by Rapport en Die Burger, en uiteindelik by Huisgenoot, waar hy tans as herskrywer werksaam is. Hy het ook in 2013 en 2014 die Rykie van Reenen-leerstoel aan die Universiteit van Stellenbosch se departement joernalistiek beklee. Sedert 2001 is hy ’n student van Heila Downey, Zen-meester van The Robertson Dharma Centre, onder wie hy meditasie en bewustelikheid (“mindfulness”) studeer. In 2017 bekragtig Downey sy status as meditasie-instrukteur in die tradisie van Kwan Um Zen en die Koreaanse leermeester Seung Sahn. Hy ondergaan oor die jare verdere opleiding in Mianmar, waar hy in 2002 ’n maand in ’n klooster deurbring, en die VSA, waar hy onder Jules Shuzen Harris en Roshi Bodin Kjolhede studeer en retraites doen. Hy woon in Bloemfontein, en bied landwyd slypskole en retraites aan met ’n fokus op meditasie, positiewe sielkunde en emosionele weerbaarheid.

Skryfwerk

Sy eerste twee boeke, Agter die Somber Gordyn (2011) en Die Einde van die Wêreld (2012) gaan oor spookstories en doemprofessieë. Hy is egter meer bekend vir sy drieluik boeke oor mindfulness - Kalmte in die Malle Gejaag (2018), Blydskap (2020) en Meer as jou Seerkry (2022), wat al drie deur Tafelberg uitgegee is. Dié boeke kombineer ’n oorsig oor die teorie en wetenskap van meditasie en mindfulness, met praktiese wenke en die verhale van mense wat persoonlike uitdagings moes trotseer. Dié boeke gee aanleiding tot ’n reeks slypskole wat hy vanaf 2023 landwyd oor mindfulness en blydskap aanbied. Sedert 2022 bied hy ook Die Blydskapnavorser op RSG aan, ’n insetsel op die oggendprogram Alhoebekker.

Publikasies

Jaar	Publikasies
2010	Agter die somber gordyn
2012	Die einde van die wêreld en hoe om dit te oorleef
2018	Kalmte in die Malle Gejaag
2020	Blydskap
2022	Meer as jou Seerkry

Bronnelys

Tydskrifte en koerante

• Fitzpatrick, Marida: “Normaal? Paranormaal…” “By”. 11 Augustus 2012
• Hugo, Trisa: "Post-traumatiese groei: Natuurlik is daar so iets." Rapport. 17 April 2022
• Schoeman, Leroux: "Die evangelie van Johannes: Word Wakker! Netwerk24. 25 April 2018
• Van der Merwe, Elna: "Dié Afrikaanse boek wys hoe jy gelukkiger kan wees." Huisgenoot. 9 April 2020

Internet

• Persoonlike webwerf: https://blydskap.com/
• Charles Apple: http://www.charlesapple.com/2015/07/birthdays-for-sunday-july-5/
• LitNet: http://www.litnet.co.za/author/johannes-bertus-de-villiers/