Joseph Pulitzer

in Wikipedia, die vrye ensiklopedie
Spring na: navigasie, soek
Joseph Pulitzer
’n Beeld van die betrokke persoonlikheid.
Geboortenaam Jószef Pulitzer
Gebore 10 April 1847
Makó, Oostenryk-Hongarye
Oorlede 29 Oktober 1911
Charleston, Suid-Carolina, VSA
Nasionaliteit Verenigde State
Beroep Verslaggewer, koerantuitgewer, advokaat, filantroop
Bekend vir Kampvegter teen groot maatskappye en korrupsie, new journalism, Pulitzerpryse
Politieke party Demokratiese Party
Religie Judaïsme
Huweliksmaat Katherine "Kate" Davis (1878-1911)
Kind(ers) Ralph, Joseph II, Constance, Edith, Herbert, Lucille
Joseph Pulitzer Signature.svg

Joseph Pulitzer [ˈpʊlɨtsər] (* 10 April 1847, † 29 Oktober 1911), gebore as Jószef Pulitzer, was 'n Hongaars-Amerikaanse Joodse verslaggewer, koerantuitgewer, advokaat en filantroop. Vandag staan hy veral bekend vir die Pulitzerpryse wat jaarliks vir prestasies in joernalistiek, fotografie, letterkunde, geskiedenis, digkuns, musiek en drama toegeken word. Die pryse word befonds uit finansiële middele wat Pulitzer aan die Columbia-universiteit bemaak het, net soos die Columbia School of Journalism wat hy in die lewe geroep het.

As dagbladuitgewer word Pulitzer verbind met die skryftegnieke van new journalism wat hy in die 1880's in sy koerante ingevoer het. In die volgende dekade was daar sterk mededinging tussen Pulitzer se World en Randolph Hearst se New York Journal wat albei persmagnate na die praktyke van geel joernalistiek laat neig het om hul dagblaaie meer aantreklik vir die breë publiek te maak. So is die weg gebaan vir koerante met massasirkulasie wat hoofsaaklik op inkomste uit advertensies aangewese was en met hul verskeidenheid nuusvorme, vermaak en advertensies by die leserspubliek gewild geraak het.

Pulitzer het aktief aan die politieke lewe deelgeneem. As lid van die Demokratiese Party het hy nasionale bekendheid verwerf, onder meer met sy veldtog teen groot maatskappye en korrupsie, en is as kongreslid vir New York verkies.