Judi Dench

in Wikipedia, die vrye ensiklopedie
Jump to navigation Jump to search
Judith Olivia "Judi" Dench
’n Beeld van die betrokke persoonlikheid.
Judi Dench tydens die BAFTAs-plegtigheid op 11 Februarie 2007

Gebore 9 September 1934
York, Yorkshire, Engeland
Nasionaliteit Vlag van Verenigde Koninkryk Verenigde Koninkryk
Titel Dame
Beroep Aktrise
Huweliksmaat Michael Williams († 2001)
Kind(ers) Finty Williams

Dame Judith Olivia "Judi" Dench, CH, DBE, FRSA (* 9 Desember 1934) is 'n Engelse toneel-, film- en televisie-aktrise.

Dench het haar debuut as aktrise in 1957 by die toneelgeselskap Old Vic Company in Londen gemaak. In die volgende jare het sy rolle in 'n verskeidenheid tonele van William Shakespeare vertolk, waaronder dié van Ophelia in Hamlet, Julia in Romeo en Julia en Lady Macbeth in Macbeth. Sy het daarnaas ook op die silwerdoek begin optree en die BAFTA-prys as Mees Belowende Nuwe Aktrise ontvang. Dench het haarself in hierdie tydperk egter veral op die toneel toegespits. Alhoewel sy nie algemeen as sangeres bekend gestaan het nie, het sy vir haar leidende rol in die musiekblyspel Cabaret in 1968 positiewe kritieke ontvang.

In die volgende twee dekades het Judi Dench as lid van die National Theatre Company en die Royal Shakespeare Company haar status as een van die mees vooraanstaande Britse toneel-akteurs bevestig. Ook op televisie het sy groot sukses met die reeks A Fine Romance behaal wat tussen 1981 en 1984 gebeeldsaai is en daarna vanaf 1992 gereeld 'n rol in die romantiese komediereeks As Time Goes By vertolk.

Voor 1995 het Dench nie gereeld op die silwerdoek opgetree nie. In daardie jaar het sy vir die eerste keer die rol van M in die James Bond-rolprent GoldenEye vertolk. Sy het ook in alle volgende Bond-rolprente, insluitende Skyfall (2012), opgetree. Ander filmrolle, wat met pryse bekroon is, sluit Koningin Victoria in Mrs. Brown (1997) asook haar optredes in rolprente soos Shakespeare in Love (1998), Chocolat (2000), Iris (2001), Mrs Henderson Presents (2005) en Notes on a Scandal (2006) in. Dench het daarnaas 'n toekenning vir haar rol in die televisiefilm The Last of the Blonde Bombshells (2001) ontvang.

Die lang lys van toekennings vir haar werk op die toneel, silwerdoek en televisie sluit elf BAFTA-pryse (waaronder die Bafta Fellowship in 2001), sewe Laurence Olivier-pryse (insluitende die Special Award), twee Screen Actors Guild-toekennings, twee Golden Globes, 'n Academy Award (Oscar), en 'n Tony Award in. In Junie 2011 het sy lidmaatskap van die British Film Institute (BFI) ontvang.

Judi Dench was sedert 1971 met die akteur Michael Williams († 2001) getroud. Uit die huwelik is 'n dogter gebore, Finty Williams, wat as aktrise in die voetspore van haar ouers gevolg het.