Klubsaalgebou UP
Die Klubsaalgebou op die Hatfieldkampus van die Universiteit van Pretoria is gebou nadat die Transvaal Universiteitskollege (TUK) in 1929 fondse beskikbaar gestel het vir die bou van ’n ontspanningsentrum vir studente. Die Klubsaalgebou, ontwerp deur die argitek Gerard Moerdyk, het 'n soortgelyke styl as dié van die Studentesake-gebou (vroeër bekend as Ou Kollegehuis). Albei geboue toon elemente van die Neo-Romaanse styl, wat die sentrale plein voor die Ou Letteregebou ook simmetries gehou het. Die eerste vlak is in 1930 voltooi en die tweede vlak in 1936. Grootskaalse restourasiewerk is in 1993 aan die Klubsaal gedoen en gevolglik is daar nou verskeie lokale vir funksies en vergaderdoeleindes sowel as ’n koffiewinkel en ’n restaurant. Die besondere teëls langs die kaggel herinner aan Hollandse Delft-teëls, maar anders as Delft-teëls, beeld dié teëls Afrika-tonele van diere, Voortrekkers, en Afrika-krygsmanne uit.[1]
