Kolchis

in Wikipedia, die vrye ensiklopedie
Kolchis en Iberië in die Antieke tydperk.

Kolchis of Colchis (Georgies: კოლხეთი, Kolcheti; Grieks: Κολχίς, Kolchis) was ’n streek en koninkryk in die Suid-Kaukasus. Dit was geleë aan die ooskus van die Swartsee, waar die hedendaagse Georgië is.

Die inwoners was waarskynlik die voorouers van die huidige Swan-, Mingreliese en Laz-volk.[1] Hulle het reeds in die Middel-Bronstydperk aan die Swartsee gewoon.[2] Kolchis was eeue lank ’n onafhanklike koninkryk, tot met sy anneksasie in 164 v.C. deur Pontus.

In die Griekse mitologie was Kolchis die plek waar die Goue Vlies was wat deur Jason en die Argonoute gesoek is. Die Goue Vlies in die mite is geskoei op die destydse gebruik onder die plaaslike inwoners om goudstof uit riviere deur vliese te sif.[3]

Geskiedenis[wysig | wysig bron]

Kolchis is sedert die Bronstydperk bewoon deur verwante, maar aparte stamme wat aan die Swartsee gewoon het. Hulle het in die 13de eeu v.C. verenig en die Koninkryk van Kolchis gestig.

Die Grieke het Kolchis in die 6de tot 5de eeu v.C. gekoloniseer en in 302 v.C. het dit deel van die pas gestigte Koninkryk van Iberië geword. Kolchis het later afgestig en in verskeie prinsdomme verdeel, tot met hul anneksasie omstreeks 101 v.C deur Mithridates VI van Pontus. Daarna was dit in oorloë met die Romeinse Ryk gewikkel. In 66 v.C. is hulle deur Pompeius verslaan en het hulle deel van die Romeinse Ryk geword.

Die Christendom het in die 1ste eeu n.C. deur Kolchis versprei en in die 4de eeu het dit die amptelike godsdiens geword. In dié tyd het dit ’n belangrike deel uitgemaak van die Middeleeuse Georgië, saam met die Koninkryk van Iberië.[4][5]

Verwysings[wysig | wysig bron]

  1. Antiquity 1994. p. 359. The Great Soviet Encyclopedia:Значение слова "Колхи" в Большой Советской Энциклопедии; The Cambridge Ancient History, John Anthony Crook, Elizabeth Rawson, p. 255
  2. David Marshal Lang, the Georgians, Frederich A. Praeger Publishers, New York, p 59
  3. "Christianity and the Georgian Empire" (early history) Library of Congress, Maart 1994, webpage:LCweb2-ge0015.
  4. David Braund, Georgia in Antiquity: A History of Colchis and Transcaucasian Iberia, 550 BC-AD 562, Oxford University Press, USA (September 8, 1994)
  5. W.E.D. Allen, A history of the Georgian people (1932), p. 123