Kosmos (satelliet)

Kosmos (Russies: Космос; "buiteruim") is ’n naam wat gegee is aan talle satelliete wat deur die Sowjetunie en daarna Rusland bedryf is. Kosmos 1, die eerste ruimtetuig met die naam, is op 16 Maart 1962 gelanseer.

Geskiedenis

'n Oekraïnse seël van 2005 wat Kosmos 1 uitbeeld.

Die eerste Sowjetsatelliete wat om die Aarde gewentel het, is Spoetnik, Poljot (van 1963 af), Elektron (in 1964), Proton (in 1965) en Molnija (in 1965) genoem, maar die meeste het sedert Maart 1962 die naam Kosmos gekry. Die program het onbemande toetse van bemande ruimtetuie en satelliete vir wetenskaplike navorsing en militêre doeleindes ingesluit.

Teen 2021 is 2 548 Kosmossatelliete gelanseer. Die ruimtetuie vorm nie ’n enkele program nie, maar bestaan eerder uit bykans alle Sowjet- en Russiese militêre satelliete, asook ’n aantal wetenskaplike satelliete en ruimtetuie wat tydens of onmiddellik ná lansering misluk het, maar steeds ’n wentelbaan bereik het.

Die naam is net aan satelliete gegee wat in ’n wentelbaan om die Aarde is. Gewoonlik is maan- en planeetsendings aanvanklik in ’n lae aardparkeerbaan geplaas saam met ’n vuurpyl wat later sowat vier minute lank sou brand om die ruimtetuig in ’n buiteruim- of heliosentriese wentelbaan te plaas. Indien die enjin nie ontsteek het nie of die verbranding nie voltooi is nie, sou die deel wat in ’n aardwentelbaan agtergebly het, ’n Kosmos-benaming kry.

Skakels

• Hierdie artikel is in sy geheel of gedeeltelik uit die Engelse Wikipedia vertaal.