Krabat (2008)

in Wikipedia, die vrye ensiklopedie
Jump to navigation Jump to search
Krabat
Regisseur Marco Kreuzpaintner
Produksieleier Jakob Claussen
Thomas Wöbke
Uli Putz
Bernd Wintersperger
Draaiboek Roman:
Otfried Preussler
Draaiboek:
Michael Gutmann
Marco Kreuzpaintner
Met David Kross
Daniel Brühl
Christian Redl
Robert Stadlober
Hanno Koffler
Paula Kalenberg
Anna Thalbach
Charly Hübner
en ander
Musiek deur Annette Focks
Kinematografie Daniel Gottschalk
Redigeerder Hansjörg Weißbrich
Verspreider 20th Century Fox
Uitgereik 7 September 2008
Speeltyd 115 min.
Land Duitsland
Taal Duits
Begroting 8 miljoen €
Amptelike webtuiste

Krabat is 'n Duitse rolprent wat in 2008 onder regie van Marco Kreuzpaintner ontstaan het. Die film baseer op die gelyknamige roman van Otfried Preussler (Engelse titel: The Satanic Mill) asook die gelyknamige Sorbiese legende.

Verhaal[wysig | wysig bron]

In die tyd van die Dertigjarige Oorlog (1618-1648) word die 14-jarige wees Krabat leerjonge in 'n meul naby Schwarzkollm in die Lausitz. Hy besef vinnig dat sy meester hier 'n "swart skool" bedryf waarin hy en sy elf metgeselle 'n opleiding in swart toorkuns ontvang. Elke jaar moet een leerjonge sy lewe opoffer sodat dié van die meester verleng kan word. Die enigste redding vir Krabat en sy metgeselle sal die liefde van 'n meisie wees.

Ontstaan[wysig | wysig bron]

Die verhaal rondom die towenaarsleerling Krabat is 'n Sorbiese legende wat veral deur die werke van Jurij Brězan (Die schwarze Mühle, 1968; Krabat oder Die Verwandlung der Welt, 1976) en Otfried Preussler (Krabat, 1971) bekendheid verwerf het.

'n Coulisse uit Krabat

Die rolprent is onder meer naby Sibiu in Roemenië en in ateljees in Bottrop, Duitsland geskiet. Om 'n egte historiese atmosfeer te skep, is daar geen gebruik van elektriese beligting gemaak nie. Die lig het deurgaans van die son, kerse, vuur en ander nie-tegniese bronne gekom. Kleure wat in die tyd van die Dertigjarige Oorlog uiters kosbaar was soos byvoorbeeld blou kom in die rolprent glad nie voor nie.

Die wêreldpremière was op 7 September 2008 by die Internasionale Toronto-filmfees. Die Duitse première het op 23 September 2008 in die historiese bioskoop Lichtburg Essen plaasgevind. Die fliek het vanaf 9 Oktober in Duitse rolprentteaters begin draai.

Die rolprent Krabat is die tweede verfilming van die onderwerp. In 1975 is die legende volgens Jurij Brežan se roman onder die titel Die schwarze Mühle en onder regie van Celino Blauweiß vir die Oos-Duitse uitsaaikorporasie Fernsehen der DDR verfilm. Daarnaas is in 1977 'n animasierolprent, Krabat, as Tsjeggies-Duitse koproduksie onder regie van Karel Zeman vervaardig wat op Otfried Preußler se roman gebaseer is.