Kultivar

in Wikipedia, die vrye ensiklopedie
Osteospermum 'Pink Whirls' is ’n kultivar wat geselekteer is vir sy kleurryke blomme.

’n Kultivar is ’n variëteit van ’n plantsoort wat deur die mens geteel of geselekteer is en nie in die natuur aangetref word nie.[1] Gewilde sierplante vir die tuin soos rose, kamelias, affodille, bergrose en asaleas is kultivars wat deur versigtige seleksie of teling gekweek is vir die blom se kleur of vorm. Voedselgewasse is ook meestal kultivars wat geselekteer is vir eienskappe soos groter oeste, smaak en weerstand teen siektes. In die houtbedryf word bome geplant wat geselekteer is vir die hoeveelheid en gehalte hout wat dit lewer.

Beskrywing[wysig | wysig bron]

Die term "kultivar" is ’n samesmelting van die Engelse woorde "cultivated" en "variety". ’n Kultivar verskil van ’n variëteit[2] en verskillende reëls word toegepas by die naamgewing.

Die internasionale vereniging vir die beskerming van nuwe variëteite plante (UPOV – Frans: Union internationale pour la protection des obtentions végétales) bied regsbeskerming aan mense en organisasies wat nuwe kultivars vir die handel bekend stel. UPOV vereis dat ’n kultivar eiesoortig, eenvormig en stabiel is. Om eiesoortig te wees, moet dit eienskappe hê wat maklik onderskeibaar is van ander bekende kultivars. Om eenvormig en stabiel te wees, moet dit hierdie eienskappe behou wanneer dit herhaaldelik voortgeplant word.

Kultivarnaam[wysig | wysig bron]

’n Kultivar kry ’n spesifieke naam: dit bestaan uit die wetenskaplike naam, gevolg deur die kultivarnaam in enkel-aanhalingstekens. Die naam van die King Edward-aartappel is byvoorbeeld Solanum tuberosum 'King Edward'.[3]

Verwysings[wysig | wysig bron]

  1. Longman, David. Gesonde Huisplante, Stap vir Stap Geïllustreer, J.L. van Schaik, Pretoria. 1992. ISBN 0 627 01827 0
  2. Lawrence, George H.M. (1953). "Cultivar, Distinguished from Variety". Baileya 1: 19–20
  3. Brickell, Chris D. et al. (eds) (2009). "International Code of Nomenclature for Cultivated Plants (ICNCP or Cultivated Plant Code) incorporating the Rules and Recommendations for naming plants in cultivation. 8th ed., adopted by the International Union of Biological Sciences International Commission for the Nomenclature of Cultivated Plants". Scripta Horticulturae (International Society of Horticultural Science) 10: 1–184. ISBN 978-90-6605-662-6

Eksterne skakels[wysig | wysig bron]