Lion & Safari Park

in Wikipedia, die vrye ensiklopedie
Jump to navigation Jump to search
'n Jagluiperd in die oorspronklike leeupark.

Lion & Safari Park is 'n bewaringsgebied vir leeus, jagluiperds, hiënas, wildehonde en verskeie bokke. Dit is in die Wieg van die Mensdom in die provinsie Noordwes geleë.

Die park[wysig | wysig bron]

Dié leeu-en-safaripark was oorspronklik 'n wildbewaringsgebied vir leeus in Gauteng. In 2016 het die park na 'n nuwe perseel van 600 hektaar in Noordwes geskuif. Die park is noord van Lanseria-lughawe en binne ryafstand van Johannesburg en Pretoria. Dit het 'n verskeidenheid inheemse roofdiere en groot herbivore.

'n Winkel in die park.

Die park is die tuiste van meer as 80 leeus, insluitende die skaars witleeus en verskye ander vleisvreters soos jagluiperds, wildehonde, gevlekte hiënas, strandwolwe, rooijakkalse en 'n groot verskeidenheid bokke wat vrylik in die wildsbokgebied rondbeweeg. Dié gebied, wat kameelperde, vlakvarke, blesbokke, wildebeeste, impalas, gemsbokke en sebras huisves, is 'n aparte area weg van die leeus en ander vleisvreters.

Benewens die dierehokke het die nuwe park 'n kinderspeelarea, restaurante, konferensiegeriewe en 'n kleinhandelsentrum binne vyf klein koepels. Gaste kan ook kameelperde, volstruise en bokke met die hand voer.[1]

Twee keer per dag bied die park leeu- en jagluiperdwandelings aan waarin besoekers in die geselskap van 'n parkwerknemer die diere volg vir 'n kort wandeling in die park.[1]

'n Welpie in die park

Welpie-interaksies[wysig | wysig bron]

Welpie-interaksies behels dat besoekers in 'n afsonderlike kamp 'n kort tydjie saam met 'n leeuwelpie kan deurbring, waartydens foto's geneem kan word en minimale interaksie met die dier moontlik is.

In 2015 het die park welpie-interaksies verbied, maar hulle het bevind dat besoekersgetalle drasties gedaal het, aangesien mense na ander plekke gegaan het wat steeds welpie-interaksies aangebied het. In 2016 is die interaksies weer as 'n bykomende deel van 'n begeleide toer by die nuwe perseel van die park hervestig. Die uitvoerende hoof, Rodney Fuhr, het gesê hulle het geen keuse nie aangesien die oorlewing van die besigheid op die spel is.[2]

Die niewinsgewende organisasie Blood Lions, wat gekant is teen die uitbuiting van leeus in enige vorm, het die park veroordeel en ook diegene wat gekies het om dit vir die welpie-interaksies te besoek. Die park glo dat hulle die interaksies beheer op 'n manier wat nie 'n negatiewe impak op die welpies sal hê nie.[2]

Aanvalle[wysig | wysig bron]

Op 1 Junie 2015 het Katherine Chappell die oorspronklike ligging van die park besoek in die geselskap van 'n toerleier, Pierre Potgieter van Kalabash-toere.[3] Chappell het haar venster oopgemaak en uitgeleun om foto's te neem, wat teen parkreëls was, toe 'n leeu haar deur die venster van die voertuig aan die nek byt. Chappell het in die Leeupark aan haar wonde gesterf voordat die paramedici opgedaag het.[4][5][6] Potgieter het die leeu verdryf en sodoende beserings aan sy arms opgedoen en 'n onbevestigde hartaanval gehad.[3] Chappell was in Suid-Afrika om te werk aan 'n projek vir die bewaring van wild[7] en het geld ingesamel vir Wildlife ACT, 'n bewaringsliefdadigheid.[8]

Ongelukkig was hierdie aanval nie 'n geïsoleerde voorval nie. In April 2015 is 'n Australiese man, Brendan Smith, deur 'n leeu aangeval toe hy sy kar se venster oopmaak. Smith het die aanval oorleef en later erken hy het skuld omdat hy sy venster oopgemaak het.[9][6]

Twee dae ná die voorval het 'n plaaslike seun deur die park op sy fiets gery nadat hy 'n gat in die heining gesny het. Hy is deur 'n jagluiperd aangeval, maar het ook oorleef.[10]

Verwysings[wysig | wysig bron]

  1. 1,0 1,1 (en) "About The Park". Lion and Safari Park. 2019. Besoek op 25 Februarie 2019.
  2. 2,0 2,1 (en) Kirk, Robyn (18 Augustus 2016). "Lion Park resumes controversial cub interaction". The Citizen. Johannesburg. Besoek op 29 Maart 2019.
  3. 3,0 3,1 (en) "Lion Park attack tour operator speaks". eNCA.com. 2 Junie 2015. Besoek op 25 Februarie 2019.
  4. (en) "Game of Thrones editor Katherine Chappell mauled to death at Lion Park pictured - Daily Mail Online". Mail Online. London. 2 Junie 2015.
  5. (en) Variety Staff. "'Game of Thrones' editor killed by lion in South Africa". bostonherald.com.
  6. 6,0 6,1 "Vrou Dood Ná Aanval Deur Leeu By Leeupark". Die Son. 2 Junie 2015. Besoek op 5 April 2019.
  7. (en) Eleftheriou-Smith, Loulla-Mae (3 Junie 2015). "Katherine Chappell: American woman killed by lion worked for Game of Thrones and wanted to 'protect wildlife'". London: The Independent. Besoek op 3 Junie 2015.
  8. (en) Snowdon, Kathryn (3 Junie 2015). "Game Of Thrones Editor, Katherine Chappell, Mauled To Death By A Lion At South African Safari Park". The Huffington Post. Besoek op 3 Junie 2015.
  9. (en) "Cheetah attacks boy at Lion Park - Traveller24". Traveller24.com. 1 April 2015. Besoek op 29 Maart 2019.
  10. 10,0 10,1 (en) "Cheetah attacks boy at Lion Park - Africa Geographic". Africa Geographic. 2 April 2015. Besoek op 29 March 2019.

Eksterne skakels[wysig | wysig bron]