Madagaskarplan

in Wikipedia, die vrye ensiklopedie
Jump to navigation Jump to search
Die ligging van Madagaskar aan die ooskus van Afrika.

Die Madagaskarplan was ’n voorstel deur die regering van Nazi-Duitsland om Jode op die eiland Madagaskar te hervestig. Franz Rademacher, hoof van die Joodse afdeling van die Duitse departement van buitelandse sake, het die idee in Junie 1940 voorgestel, kort voor die val van Frankryk. Die voorstel het behels dat die beheer oor Madagaskar, destyds ’n Franse kolonie, aan Duitsland oorgedra word as deel van die voorwaardes van Frankryk se oorgawe.

Die plan[wysig | wysig bron]

Die moontlikheid om Poolse Jode op Madagaskar te hervestig is in 1937 deur die Poolse regering ondersoek,[1][2] maar die taakspan wat daarheen gestuur is om die eiland se potensiaal te ondersoek het bepaal dat net 5 000 tot 7 000 gesinne geakkommodeer sou kon word, of selfs net 500 volgens sommige ramings. Omdat Nazipogings om Duitsland se Jode aan te moedig om voor die Tweede Wêreldoorlog te emigreer net gedeeltelik suksesvol was, het die Naziregering in 1940 weer die idee geopper om Jode op Madagaskar te hervestig.

Met die goedkeuring van Adolf Hitler het Adolf Eichmann op 15 Augustus 1940 ’n memorandum uitgereik vir die hervestiging van miljoen Jode per jaar vir vier jaar en dat die eiland ’n polisiestaat onder die SS sou wees. Hulle het aangeneem baie Jode sou beswyk onder die strawwe toestande as die plan in werking gestel sou word.[3] Die plan was egter nie haalbaar nie weens die Britse blokkade van Duitsland. Dit is uitgestel nadat die Nazi's die Slag om Brittanje in September 1940 verloor het, en in 1942 eindelik afgestel met die begin van die Finale Oplossing, waartoe die idee in ’n groot mate bygedra het.[4]

Verwysings[wysig | wysig bron]

  1. Browning 2004, p. 82.
  2. Nicosia 2008, p. 280.
  3. Longerich 2010, p. 162.
  4. Browning 1995, pp. 18–19,127–128.

Bibliografie[wysig | wysig bron]

  • Browning, Christopher R. (2004). The Origins of the Final Solution : The Evolution of Nazi Jewish Policy, September 1939 – March 1942. Comprehensive History of the Holocaust. Lincoln: University of Nebraska Press. ISBN 0-8032-1327-1. 
  • Browning, Christopher R. (1995). The Path to Genocide: Essays on Launching the Final Solution. Cambridge: Cambridge University Press. ISBN 978-0-521-55878-5. 
  • Longerich, Peter (2010). Holocaust: The Nazi Persecution and Murder of the Jews. Oxford; New York: Oxford University Press. ISBN 978-0-19-280436-5. 
  • Nicosia, Francis R. (2008). Zionism and Anti-Semitism in Nazi Germany. Cambridge; New York: Cambridge University Press. ISBN 978-0-521-88392-4. 

Eksterne skakels[wysig | wysig bron]