Mission Earth
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Mission Earth
| |
|---|---|
| Skrywer | L. Ron Hubbard |
| Land |  Verenigde State |
| Taal | Engels |
| Genre | Wetenskapsfiksie |
| Uitgewer | Bridge Publications |
| Uitgegee | 1985 en 1987 |
| Medium | Druk (gebind & sagteband) |
Mission Earth is 'n wetenskapsfiksie-roman wat deur L. Ron Hubbard (1911–1986), stigter van die Kerk van Sciëntologie, geskryf en in tien boekdele gepubliseer is. Hubbard is drie maande ná die publikasie van die eerste boekdeel oorlede sodat die nege oorblywende boekdele postuum deur Bridge Publications, die Kerk van Sciëntologie se uitgewery vir Noord-Amerika, gepubliseer is.
Bridge Publications het met 'n neologisme na die reeks verwys en dit as dekaloog (dekalogy) – 'n reeks van tien boeke – beskryf. Die werk met altesaam 1,2 miljoen woorde val volgens skrywer en uitgewery onder die genre van satiriese wetenskapsfiksie, as 'n avontuur wat in die toekoms afspeel. Elke boekdeel in die reeks het teen die blitsverkoperlyste opgeklim, terwyl boekdeel II, Black Genesis, in 1987 vir die Hugo Award se kategorie van "beste roman" benoem is.
Storielyn[wysig | wysig bron]
'n Buiteaardse samelewing, die Voltars, wat sowat 22 ligjare van die Aarde af bestaan, beoog om die planeet as basis vir hul beplande inval in die galaktiese sentrum te verower. Hulle is oortuig daarvan dat die Aardbewoners as gevolg van omgewingsbesoedeling en moontlik ook oorlog op die drumpel van selfvernietiging is en sodoende die opgestelde tydsplan vir die verowering moontlik sal ontwrig.
Vlootingenieur Jettero Heller, 'n soort held met 'n volmaakte karakter, eerlik, onomkoopbaar en met verstommende vaardighede, kry die opdrag om die vernietiging van die Aarde te verhinder. Terwyl hy sy kwartier in New York Stad betrek, die Gracious Palms-bordeel wat veral by diplomate van die Verenigde Nasies gewild is, om die saak te ondersoek, word hy dopgehou deur 'n lid van die Voltariaanse geheimediens, die Apparatus, Lombar Hisst, 'n man met 'n diaboliese karakter. Sekere faksies op Voltar is vasbeslote om Heller se missie te saboteer.
Kommandeur Hisst en sy Apparatus is van plan om die Voltariaanse troon in besit te neem en beskik reeds oor 'n geheime basis in Turkye. Om Voltar te beheer, voer Hisst onwettige dwelmmiddels vanaf die Aarde na Voltar uit om daar regeringshoofde met die dwelms te verslaaf.