NG gemeente Leonard

in Wikipedia, die vrye ensiklopedie
Jump to navigation Jump to search
Ds. S. Murray het die NG kerk Leonard se hoeksteen op 6 Julie 1957 gelê. Die argitekte was Louw & Louw, Wynand Louw se argiteksfirma.
Eerw. (later ds.) E.J. Leonard na wie die gemeente genoem is, wat van 1911 as sendeling in Suidwes-Afrika gewerk het en in 1932 as predikant gelegitimeer is, toe hy leraar van die gemeente Gibeon geword het.
Ds. Samuel Murray, leraar van Leonard van 1950 tot 1958 en voorheen van 1947 tot 1950 van die NG gemeente Hofmeyr, destyds Maraisburg, K.P.

Die NG gemeente Leonardville (vroeër net Leonard) is 'n gemeente van die Nederduitse Gereformeerde Kerk op die Namibiese dorpie Leonardville.

Leonard is op die elfde dag van die elfde maand (11 November) 1944 as die elfde gemeente van die Kaapse Kerk in die destydse Suidwes-Afrika gestig. Lidmate was dit eens dat die gemeente moes heet na die onvergeetlike baanbreker van die Kerk in Suidwes-Afrika, eerw. (later ds.) E.J. Leonard. So dikwels het hy per eselkar oor die uitgestrekte vlaktes van die land en selfs te voet verkwikking aan eensame plase gebring. Die gemeente se heel eerste beroep op 6 Januarie 1945 het geslaag en so kom ds. en mev. C. van der Merwe op 13 April 1945 in die gemeente aan. Hulle pas hulle in moeilike omstandighede in die afgeleë gemeente aan. Hulle moes byna 'n jaar lank in die konsistorie van die kerksaal op Pretorius woon. Die gemeente het met ongeveer 500 lidmate van die gemeente Gibeon afgestig, maar ná net agt jaar reeds oor die duisend lidmate getel. Hierdie getal het egter teen 2010 teruggesak tot net 176 weens die gedurige ontvolking van die platteland.

Die gemeente het met sy stigting meer as 25 000 km² beslaan, 'n gebied so groot soos die Afrikaland Rwanda. Dit het noodwendig tot veel desentralisasie gelei, wat in 'n mate verlig is met die afstigting van die NG gemeente Aroab in 1955. Daar was aanvanklik geen gemeentelike sentrum nie, en daarom het dit teen 1952 uit vier feitlik selfstandige wyke bestaan, naamlik Uhlenhorst met 140 lidmate, Blumfelde met sowat 140 lidmate, Aroab met sowat 360 lidmate en Pretorius met sowat 320 lidmate. Die pastorie was op Pretorius geleë, terwyl elke wyk sy eie kerksaal gehad het waar een maal per maand eredienste waargeneem is en twee maal per jaar nagmaal bedien is. Ds. S. Murray is op 26 Augustus 1950 as die gemeente se tweede leraar bevestig.

Enkele leraars[wysig | wysig bron]

  • Cornelis van der Merwe, 1945 - 1949
  • Samuel Murray, 1950 - 1958
  • Petrus Hendrik Christiaan Gideon Landman, 1959 - 1961
  • S.J. Pieterse, 23 Junie 1962 - 1966, waarna Otavi
  • Andries Gouws Auret, 1967 - 1976
  • Alwyn Johannes Nagel, 1976 - 1981

Bronne[wysig | wysig bron]

Eksterne skakels[wysig | wysig bron]