Namib-ekostreek

in Wikipedia, die vrye ensiklopedie
Namib-ekostreek
Ekostreek
WWF-kode AT1315
Lande Namibië
Bioom Woestyn en droë struikveld
Ekosone Afrotropiese gebied
Floraryk Paleotropis
Oppervlakte   80 800  km²
Beskerm %
Portaal  Portaalicoon   Biologie

Die Namib-ekostreek is 'n WWF-ekostreek wat die hart van die Namibwoestyn beslaan. Dit bestaan uit twee dele: die sentrale Namib en die suidelike Namib. Die suidelikste deel vanaf Lüderitz, soos die Spergebied, word nogtans by die sukkulente Karoo gereken, omrede daar ook sukkulente voorkom, hoewel die gebied reeds baie droog is. Die noordelike Namibwoestyn word by die woestyn van Kaokoveld-ekostreek ingedeel, omrede dit somerreëns ontvang. Die oosgrens van die Namib-ekostreek word deur die 100 mm isohieet gevorm. Hierdie ekostreek is een van die droogste. Aan die kus val slegs 2 mm reën per jaar. Die wind wat van die Indiese Oseaan kom het sy vog oor die Drakensberge verloor en kom droog en heet oor die Namib omlaag. Die winde wat van die Atlantiese Oseaan kom, is koud. Daar ontstaan 'n termiese inversie waardeur geen wolke gevorm kan word nie. Aan die kus is daar wel dikwels mis wat tot 50 km die land in kan dring. Hierdie mis is die grondslag van die Namib se lewensgemeenskap. [1]

Flora[wysig | wysig bron]

Die duine van die suide is baie min begroei. Daar is net 'n paar plantespesies wat hier kan lewe, soos die grasse Stipagrostis sabulicola en S. gonatostachys en die blomplant Monsonia ignorata en die vygie Trianthema hereroense. Tussen die duine en die kus word heuveltjies gevorm deur die plante Acanthosicyos horridus, Arthraerua leubnitziae en Zygophyllum stapfii. In die sentrale Namib kom dwergstruikies voor wat tussen hul takke met sand opgevul word, soos Psilocaulon salicornioides, Zygophyllum clavatum, Salsola aphylla en S. nollothensis. Op klipperige plekke groei Drosanthemum luederitzii, Eberlanzia sedoides en Tetragonia arbusculoides. 'n Wonderlike endemiese plant is Welwitschia mirabilis. [1]

Fauna[wysig | wysig bron]

Veral onder reptiele word endemiese spesies aangetref. Daar is 70 reptiele in die ekostreek en 25 is endemies daaraan, byvoorbeeld Meroles cuneirostris, M. micropholidotus, Ptenopus kochi en Rhoptropus bradfieldi. Daar is slegs ongeveer 180 voëlspesies in hierdie ekostreek, een daarvan is endemies aan die streek: Certhilauda erythrochlamys. Daar is vyf amper endemiese spesies wat ook in die Koako-streek voorkom. C. benguelensis, Ammomanes grayi, Phalacrocorax neglectus, Cercomela tractrac en Eupodotis rueppellii.[1]

Galery[wysig | wysig bron]

Beskerming[wysig | wysig bron]

Die ekostreek is grotendeels ongeskonde en die Namib-Naukluft Nasionale Park beslaan 'n aansienlike deel van die ekostreek.

Verwysings[wysig | wysig bron]

  1. 1,0 1,1 1,2 "WWF" (in Engels). Geargiveer vanaf die oorspronklike op 4 Maart 2020.