Namib-Naukluft Nasionale Park

in Wikipedia, die vrye ensiklopedie
Spring na: navigasie, soek
Namib-Naukluft Nasionale Park
Sandduine naby Sossusvlei
Sandduine naby Sossusvlei
Land Namibië
Naaste dorp Windhoek
Ligging van Namib-Naukluft Nasionale Park op 'n kaart (Namibië)
Namib-Naukluft Nasionale Park
Namib-Naukluft Nasionale Park
Koördinate: 24°32′47″S 15°19′47″O / 24.54639°S 15.32972°O / -24.54639; 15.32972Koördinate: 24°32′47″S 15°19′47″O / 24.54639°S 15.32972°O / -24.54639; 15.32972
Oppervlak 49 768 km²
Openingsjaar 1979
Bestuursliggaam Ministerie van Omgewingsake
en Toerisme

Die Namib-Naukluft Nasionale Park is 'n nasionale park van Namibië. Die park sluit 'n deel van die Namibwoestyn en die Naukluftberge in. Die gebied het 'n totale oppervlakte van 49 768 vierkante kilometer en is die grootste wildspark in Afrika en die vierde grootste ter wêreld.[1] Die bekendste gebied in die park is Sossusvlei (saam met die Dooievlei), wat een van die belangrikste toerisme-aantreklikhede van Namibië is.

Satellietbeeld wat die grense van die park aandui.

Die dorre streek onderhou 'n verrassende verskeidenheid dierelewe, waaronder slange, geitjies, ongewone insekte, hiënas, gemsbokke en jakkalse. Vog kom die gebied in die vorm van mis vanaf die Atlantiese Oseaan binne, wat dan as reën val. Die gebied kry gemiddeld 106 millimeter neerslag per jaar, wat hoofsaaklik in die maande van Februarie en April gekonsentreer is.

Die wind wat die mis inwaai is ook vir die park se manjifieke sandduine verantwoordelik. Die duine se gebrande oranjekleurige voorkoms is aan hul ouderdom te danke. Oor die jare het yster in die sand geoksideer (soos verroeste metaal). Hoe ouer die duin, hoe helderder die kleur.

Hierdie duine is die hoogste ter wêreld en styg op plekke meer as 300 meter bo die woestynvlakte uit. Die duine loop trapsgewys na die kus af. Die strandmere, vleie en moddervlaktes langs die kus trek honderde duisende voëls na die gebied.

'Namib' beteken 'oop ruimte' en Namibië se naam is van die Namibwoestyn ontleen - "die land van oop ruimtes". Die park is in 1907 gestig toe die Duitse koloniale administrasie die gebied tussen die Swakop- en Kuiseb-riviere tot 'n wildspark verklaar het. Die park met sy huidige grense is in 1979 gesig, deur die samevoeging van die 'Namib-woestynpark', die 'Naukluft-bergkwaggapark' (gestig in 1964) en dele van Diamant Spergebied 1, asook omliggende stukke regeringsgrond.

Die park het 'n verskeidenheid van die ongewoonste diere en natuurlike gebiede ter wêreld, en het 'n oppervlakte van 49 768 km². Die streek word gekenmerk deur hoë, geïsoleerde eilandberge en koppies, opgebou uit dramatiese bloedrooi graniet, ryk aan veldspaat en sandsteen. Die Naukluftberge is in die verre oostelike deel van die park geleë.

Fotogalery[wysig | wysig bron]

Verwysings[wysig | wysig bron]