Nigel Farage

Nigel Farage
Leier van Reform UK
Ampsbekleër
Termynaanvang 3 Junie 2024
Vise	David Bull Ben Habib Richard Tice
Voorafgegaan deur	Richard Tice
Lid van die Europese Parlement vir Suidoos-Engeland
Ampstermyn 10 Junie 1999 – 31 Januarie 2020
Persoonlike besonderhede
Gebore	3 April 1964 (1964-04-03) Kent, Engeland, Verenigde Koninkryk
Politieke party	Konserwatiewe Party (1978–1993) Anti-Federalist League (1992–1993) UKIP (1993–2018) Onafhanklik (2018–2019) Reform UK (sedert 2019)
Eggenoot/-note	Gráinne Hayes (1988–1997, geskei) Kirsten Mehr (sedert 1999)
Kind(ers)	Vier
Alma mater	Dulwich-kollege
Religie	Kerk van Engeland

Nigel Paul Farage (/ˈfærɑːʒ/; gebore 3 April 1964) is ’n Britse politikus wat sedert 2024 Lid van die Parlement (MP) vir Clacton en Leier van Reform UK is, nadat hy reeds van 2019 tot 2021 die leier van dié party was. Hy was die leier van die Verenigde Koninkryk Onafhanklikheidsparty (UKIP) van 2006 tot 2009 en weer van 2010 tot 2016. Farage het van 1999 tot en met die Verenigde Koninkryk se onttrekking uit die Europese Unie (EU) in 2020 as lid van die Europese Parlement (MEP) vir Suidoos-Engeland gedien.

Farage het die Konserwatiewe Party in 1992 ná die ondertekening van die Maastricht-verdrag verlaat om 'n stigtingslid van die UKIP te word. Hy was onsuksesvol in die Europese en Britse verkiesings sedert 1994, maar het uiteindelik in die verkiesings vir die Europese Parlement in 1999 'n setel as afgevaardigde vir Suidoos-Engeland gewen nadat 'n stelsel van streeksgebonde kandidatelyste ingevoer is. Farage is in 2004 en 2009 herverkies.

In September 2006 is Farage as leier van die UKIP aangewys en het dié party se verkiesingsveldtog vir die Europese Parlementsverkiesing in 2009 gevoer. Die UKIP het betreklik goed in die verkiesing gevaar en die tweede sterkste party geword met twee miljoen van die uitgebragte stemme, nog voor die Arbeidersparty (Labour) en die Liberale Demokrate. In November 2009 het Farage as UKIP-partyleier bedank om in die Britse algemene verkiesing van 2010 teen die destydse speaker van die Britse Laerhuis, John Bercow, in die Buckingham-kiesafdeling te staan. Farage was onsuksesvol in dié poging en kon slegs die derde hoogste persentasie van die uitgebragte stemme op hom verenig. Kort nadat verkiesingslokale op 6 Mei 2010 geopen het, is Farage in 'n vliegtuigongeluk in Nottinghamshire beseer.

In November 2010 is Farage weer as leier van die UKIP aangewys nadat die vorige voorsitter, Lord Pearson of Rannoch, bedank het. Farage het veral bekendheid met sy vurige en soms ook omstrede toesprake in die Europese Parlement verwerf. Op 4 Julie 2016 het hy bekend gemaak dat hy as UKIP-partyleier bedank.

Op 3 Junie 2024 het hy leier geword van die nuwe regs-populistiese party, Reform UK. Op 4 Julie 2024 het Farage die Clacton-setel gewen met 46,2% van die plaaslike stemme en sodoende vir die eerste keer ’n Lid van die Parlement (LP) geword. Benewens Farage is nog vier kandidate van Reform UK tot die parlement verkies. Met die Konserwatiewes nou in die opposisie, het Farage sy aandag gefokus op die wen van setels teen die regerende Arbeidersparty in die volgende verkiesing, en gesê: "Reform is nou tweede na Labour in 87 setels in hierdie land. Ons kom vir jou, Keir Starmer".

Na die Verenigde Koninkryk se uittrede uit die Europese Unie – wat Farage se vernaamste beleidsprioriteit was – het hy hom toenemend begin toespits op binnelandse beleidsake soos belastingverligting, ’n kritiese benadering tot maatreëls teen klimaatsverandering, en beloftes om die klein bote met migrante van regoor die wêreld, wat in groot getalle die kus van Suidoos-Engeland bereik, te beperk.

Eksterne skakels

• Wikimedia Commons het meer media in die kategorie Nigel Farage.
• Nigel Farage – Amptelike webtuiste