Nigella Lawson

Nigella Lawson in 2017.

Nigella Lucy Lawson (gebore in Londen, 6 Januarie 1960) is 'n Engelse aanbieder en joernalis, veral bekend vir haar kookrubrieke en -programme.

Nigella is die dogter van Nigel Lawson, of baron Lawson van Blaby, en Vanessa Salmon. Vanessa is op die ouderdom van 48 aan lewerkanker oorlede.

Nigella Lawson studeer Middeleeuse en moderne tale aan die Universiteit van Oxford, waarna sy 'n loopbaan in joernalistiek begin. Sy lewer 'n aantal bydraes in hierdie veld, onder meer as assistentletterkunderedaktrise by The Sunday Times, en later as vryskutskrywer by The Guardian, The Daily Telegraph en Time Magazine.

Haar verbintenis met kook en die media begin toe sy 'n restaurantrubriekskrywer in The Spectator en later by Vogue word. In 1998 word haar eerste kookboek gepubliseer: How to Eat. Daarna bied sy 'n kookprogram, genaamd Nigella bites, in 2001 op Channel 4 aan, gevolg in 2002 deur Forever summer with Nigella. In 2012 maak sy die program Nigellissima vir die BBC.

In 1992 ontmoet en trou sy met John Diamond, haar destydse kollega by The Sunday Times. Hulle het twee kinders. Diamond het keelkanker ontwikkel en is in 2001 oorlede. In September 2003 is Lawson getroud met Charles Saatchi, medestigter van die advertensie-agentskap Saatchi en Saatchi. In 2013 was Saatchi negatief in die nuus weens moontlike mishandeling van Nigella. Hy het haar 'n keer in die openbaar aan die keel gegryp. Op 7 Julie 2013 is aangekondig dat die twee besig is om te skei.

Lawson begin in 2013 die kookprogram The Taste vir die Amerikaanse kanaal ABC. Die Britse weergawe vir Channel 4 volg ’n jaar later. Weens teleurstellende kyksyfers word albei programme in 2015 gestaak. Later daardie jaar begin Lawson Simply Nigella vir die BBC.

Eksterne skakels

• www.nigella.com