O.P.M. Prozesky

O.P.M. Prozesky, om en by 1964

Otlef Paul Martin Prozesky (20 Junie 1914 – c.2000) is op Ermelo in Transvaal gebore as die seun en kleinseun van sendelinge van die Berlynse Sendinggenootskap. As kleuter het hy sy pa op sendingreise met kar en perd vergesel, een daarvan na Swaziland. Hiertydens het sy pa by hom ‘n liefde vir die natuur aangewakker. Nadat hy op Ermelo matrikuleer, bekwaam hy hom as onderwyser in Pretoria. By die Universiteit van Pretoria verwerf hy ook ‘n BSc-graad met Wiskunde en Fisika as hoofvakke.

Nadat hy vir 23 jaar by ondermeer Afrikaanse Hoër Seunskool skoolgee, bedank hy om voltyds Dierkunde by Tuks te studeer. Toe Austin Roberts in 1940 sy "Birds of South Africa" publiseer het dit sy belangstelling op voëls gevestig. In 1956 was hy verantwoordelik vir die totstandkoming van die Austin Roberts-voëlreservaat in Pretoria. Sedert 1958 was hy aan die Transvaal Museum verbonde as voëlkundige. Hiertydens het hy sy nagraadse studie rakende die waterverbruik van saadvretende voëls begin, met die Kalahari- en Namibwoestyne as navorsingsgebiede.

In 1964 het hy met die opname van ‘n praatjiereeks, "Ons Voëls", by die SAUK begin. Dit was sodanig gewild by die publiek dat die stasie met versoeke oorval is om die praatjies in boekvorm uit te gee. "Ons Voëls" is in 1964 deur Voortrekkerpers uitgegee. Hy het dit opgevolg deur in 1970 ook "A Field Guide to the Birds of Southern Africa" uit te gee, waarvan in 1974 ‘n Afrikaanse vertaling, “Veldgids – Voëls van Suider-Afrika”, verskyn het, waarvan in 1975 'n tweede oplaag verskyn het. Hy en Johan Nel was medeskrywers van "Ons Geveerde Vriende", 'n reeks van 10 episodes wat in 1985 op TV1 verskyn het. In 1988 het die Universiteit van Pretoria aan hom die kanselliersmedalje toegeken. Die OPM Prozesky-voëlreservaat van 60 hektaar te Potchefstroom is na hom vernoem.

Hy was getroud met Marie Niemeyer (1914–), en later met Lieselotte Schulze (1917–2011), 'n entomoloog. Sy oupa, J.J.A. Prozesky (1840–1915), het in 1868 die Königsberg-sendingstasie naby Newcastle aangelê, en tydens die Tweede Vryheidsoorlog na die Boere oorgeloop, waarvoor hy byna die doodstraf ontvang het.