Orongo

in Wikipedia, die vrye ensiklopedie
Jump to navigation Jump to search
’n Kaart van die ligging van Orongo op Paaseiland.

Orongo is ’n klipdorp en seremoniële sentrum aan die suidwestekant van Paaseiland. Dit lê op ’n hoë punt van die groot vulkaankrater Rano Kau en bevat ’n klompie lae, vensterlose, ronde kliphuise met selfs laer deuropeninge. Onder Orongo strek die een kant van ’n 300 meter hoë krans steil af tot onder by die oseaan; die ander, korter en grasbedekte kant (wat egter ook steil is) loop af na ’n varswatermoeras in die hoë krater.

Die eerste helfte van die seremoniële dorp se 53 kliphuise is in 1974 ondersoek en gerestoureer, en die ander in 1976. Hulle is weer in 1985 en 1995 ondersoek. Orongo het nou status as Unesco-wêrelderfenisgebied as deel van die Rapa Nui Nasionale Park.

Geskiedenis[wysig | wysig bron]

Die 300 meter hoë, steil helling van Rano Kau waarteen eierjagters moes afklim na die see tydens die jaarlikse eierjag. Orongo is links heel bo op die krater se rand.

Tussen die 18de en 19de eeu was Orongo die middelpunt van Paaseiland se voëlmankultus. ’n Jaarlikse resies is gehou om die eerste eier van die manutara (roetsterretjie) onbeskadig van die eilandjie Motu Nui na Orongo te bring. Dit was ’n uiters gevaarlike kompetisie waarin klimmers hulle dikwels doodgeval het. Die terrein het talle petrogliewe, hoofsaaklik van tangata manu (voëlmans) wat uitgekerf kon gewees het om die wenners van die resies te vereer.

In die 1860's was die grootste deel van die Rapa Nui-volk óf dood aan siektes óf in slawerny en toe die res gekersten is, het Orongo in onbruik geraak. In 1868 het die bemanning van die HMS Topaze die groot basalt-moai, bekend as Hoa Hakananai'a, van Orongo verwyder. Dit is nou in die Britse Museum.

Die terrein is in 1996 ingesluit in die World Monuments Watch en weer in 2000. Die bedreiging was gronderosie, veroorsaak deur reën en vererger deur menseverkeer.[1] Ná 2000 het die organisasie ’n bestuursplan vir die terrein help saamstel met help van American Express, en op 13 Mei 2011 is ’n besoekersentrum gebou.[2][3]

Galery[wysig | wysig bron]

Verwysings[wysig | wysig bron]

Bronne en eksterne skakels[wysig | wysig bron]

  • Mulloy, William. Investigation and Restoration of the Ceremonial Center of Orongo. International Fund for Monuments Bulletin No. 4. New York (1975).
  • Mulloy, W.T., and S.R. Fischer. 1993. Easter Island Studies: Contributions to the History of Rapanui in Memory of William T. Mulloy. Oxford: Oxbow Books.
  • Routledge, Katherine Pease. 1919. The Mystery of Easter Island; the Story of an Expedition. London, Aylesbury, Printed for the author by Hazell, Watson and Viney. ISBN 0-932813-48-8 (1998 US reprint)
  • Wikimedia Commons logo Wikimedia Commons het meer media in die kategorie Orongo.
  • Crystal txt.png Hierdie artikel is vertaal uit die Engelse Wikipedia

Koördinate: 27°11′22″S 109°26′33″W / 27.18944°S 109.44250°W / -27.18944; -109.44250