Owen Rhoscomyl
Owen Rhoscomyl (* 6 September 1863, Southport, Merseyside, Engeland - † 15 Oktober 1919, Londen Engeland) is ’n skuilnaam van Arthur Owen Vaughan. Vaughan is veral bekend vir die bydrae wat hy tot die Afrikaanse literatuurgeskiedenis gemaak het met sy, en sy vrou, Katherine Louisa Vaughan se boek Ou Hendrik se stories. As Owen Rhoscomyl publiseer hy verskeie Engelse romans en geskiedkundige werke.
Lewe en werk
[wysig | wysig bron]Robert Scourfield Mills is op 6 September 1863 in Southport, Merseyside in Engeland gebore. In sy grootwordjare ervaar hy verskeie ontwrigtings wat veroorsaak dat hy uiteindelik by sy ouma (aan moederskant) in Wallis grootword. Dit is ook sy ouma wat hom Owen begin noem.
As vyftienjarige loop hy weg van die huis en gaan per skip na Amerika waar hy ondermeer as cowboy en prospekteerder werk. Na sy terugkeer na Engeland sluit hy by die Britse Weermag aan. (Tydens hierdie fase van sy lewe staan hy as Robert Milne bekend.) Hoewel hy geforseer word om uit die weermag te bedank, besluit hy om op eie stoom na Suid-Afrika te gaan met die uitbreek van die Anglo-Boereoorlog in 1899. Met sy aankoms in Suid-Afrika word hy toegelaat tot die Rimington’s Guides. As deel van hierdie eenheid is hy betrokke by verskeie veldslae (o.a. Magersfontein, Modderrivier en Belmont) en ontsettings (o.a. Johannesburg, Paardeberg en Kimberley).[1]
In Suid-Afrika ontmoet hy ook die boeremeisie, Katherine Louisa de Geere. Hulle trou, sonder die toestemming van haar ouers op 21 Desember 1900, op die walle van die Vaalrivier.[2]
Die paartjie keer terug na Engeland en Vaughan begin onder die naam Owen Rhoscomyl, wat hy aflei van Rho(bert) Sco(urfield) Myl(ne), te skryf.
Vaughan sit sy loopbaan as soldaat tydens die Eerste Wêreldoorlog voort. Vir sy dapperheid en getroue diens in die weermag en in oorlogstoestande verower hy die Distinguished Service Order (DSO) en die koning ken ook na sy dood die Order of the British Empire (OBE) toe.[3]
Hy en Katherine het vier kinders. Arthur Owen Vaughan is op 15 Oktober 1919 in ’n hospitaal in Londen aan lewerkanker oorlede.[3]
Publikasies
[wysig | wysig bron]| Jaar | Titel van publikasies |
|---|---|
| 1895 | The Jewel of Ynys Galon |
| 1896 | Battlement and Tower |
| 1897 | The White Rose of Arno |
| 1898 | The Shrouded Face |
| 1905 | Flame-Bearers of Welsh History |
| 1906 | Old Fireproof |
| 1907 | Dewi Sant, St. David (saam met eerw. J.E. Davies)
Sweet Rogues Vronina |
| 1908 | Isle Raven
A scout’s story |
| 1912 | The children of Don (saam met lord Howard de Walden) |
| 1913 | Lone tree lode
The Matter of Wales |
Sien ook
[wysig | wysig bron]Verwysings
[wysig | wysig bron]- ↑ SA Military History: http://samilitaryhistory.org/16/c16febne.html
- ↑ Dictionary of Welsh Biography: http://yba.llgc.org.uk/en/s-VAUG-OWE-1863.html
- ↑ 3,0 3,1 Frontiersmen Historian: http://www.frontiersmenhistorian.info/motto.htm
Normdata  |
|
|---|