Peter Sarstedt

in Wikipedia, die vrye ensiklopedie
Peter Sarstedt
GeboortenaamPeter Eardley Sarstedt
Ook bekend asPeter Lincoln
Gebore(1941-12-10)10 Desember 1941
Nieu-Delhi, Brits-Indië
Sterf08 Januarie 2017 (op 75)
Sussex, Engeland
Genres
Beroep(e)Sanger-liedjieskrywer, musikant
Instrumente
  • Stem
  • kitaar/ghitaar
EtiketteUnited Artists Records
Island Records
Angel Air Records
Singer Records
Warner
Assosiasies
  • Eden Kane
  • Clive Sarstedt

Peter Eardley Sarstedt[1] (10 Desember 1941 – 8 Januarie 2017), in sy vroeë loopbaan bekend as Peter Lincoln, was 'n Engelse sanger-liedjieskrywer en musikant. Hy was die broer van die musici Eden Kane en Clive Sarstedt.

Alhoewel sy musiek as popmusiek geklassifiseer word, sluit dit oor die algemeen tradisionele ballades in wat afkomstig is van tradisionele folkmusiek, eerder as rockmusiek. Hy is veral bekend vir sy skryfwerk en die liedjie "Where Do You Go To (My Lovely)?", wat in 1969 bo-aan die trefferslys van die Verenigde Koninkryk was. Die liedjie het 'n Ivor Novello-toekenning gewen. Dit was Sarstedt se grootste treffer. Hy het een verdere enkelsnit treffer en trefferplaat gehad, maar nooit weer sy vorige hoogtes bereik nie.

Sarstedt het in totaal 15 plate in sy lang loopbaan van 50 jaar uitgereik [2][3]. Hy het voortgegaan om in die 1980's, 1990's and 2000's te toer tot sy uittrede in 2010 as gevolg van swak gesondheid.

Vroeë lewe[wysig | wysig bron]

Sarstedt is in 1941 in Nieu-Delhi gebore uit 'n gesin wat lank reeds in Indië woonagtig was. Sy voorouer Christian Ludwig Wilhelm Sarstedt, gebore in 1841 in Hanover, het na Indië gemigreer en is daar in 1893 oorlede. Sy vader, Albert James Sarstedt, 'n staatsamptenaar in Brits-Indië, was getroud met Coral Byrne. [4][5][1] Beide sy ouers het opleiding ontvang in klassieke musiek.

Nadat Indië in 1947 onafhanklikheid van Brittanje verkry het het Sarstedt se ouers 'n teeplantasie in die Darjeeling-distrik van Wes-Bengaal bedryf waar Sarstedt die Victoria Boys' School in Kurseong bygewoon het.[1][6] Hy is later na Kalkutta; in 1954 is Sarstedt se vader oorlede, waarna die gesin na Engeland verhuis het,[1][6] waar hulle hulle in Suid-London gevestig het, net voor die opgang van rockmusiek.[1] Die Sarstedt-broers het aanvanklik skiffle-musiek[7]. [1] gespeel in 'n groep bekend as die Fabulous Five.[8]

Sarstedt was die jonger broer van die 1960's popster Eden Kane, en 'n ouer broer van die popsanger Clive Sarstedt.[9]

Persoonlike lewe en afsterwe[wysig | wysig bron]

Sarstedt het in 1969 met die tandarts Anita Atke getrou en na Denemarke verhuis. Die paartjie is vyf jaar later geskei.[10] Sy tweede huweliksmaat was Joanna Meill. Hy het vanaf 2013 in 'n aftreeoord in Sussex, Engeland gewoon. Hy het gelei aan progressiewe supranukleêre parese (PSP), wat in 2015 gediagnoseer is, maar in 2013 verkeerdelik gediagnoseer is as demensie. Hy sterf op 8 Januarie 2017 op 75-jarige leeftyd.[11] Hy word oorleef deur sy vrou en twee volwasse kinders.[10]

Verwysings[wysig | wysig bron]

  1. ↑ 1,0 1,1 1,2 1,3 1,4 1,5 Unterberger, Richie. "Peter Sarstedt". Allmusic. Besoek op 20 September 2020.
  2. ↑ "Peter Sarstedt dead: Pop star behind one of the most iconic songs of the Sixties dies aged 75". Independent. 8 Januarie 2017. Geargiveer vanaf die oorspronklike op 26 Mei 2022. Besoek op 8 Januarie 2017.
  3. ↑ "Peter Sarstedt – Albums". petersarstedt.com. Besoek op 8 Januarie 2017.
  4. ↑ "Peter Sarstedt". 45-rpm.org.uk. Besoek op 28 September 2014.
  5. ↑ "Peter Sarstedt". British Academy of Songwriters, Composers and Authors. Geargiveer vanaf die oorspronklike op 3 Maart 2014. Besoek op 14 Mei 2012.
  6. ↑ 6,0 6,1 "British-Indian singer-songwriter Peter Sarstedt dead at 75". Scroll. 9 Januarie 2017. Besoek op 9 Januarie 2017.
  7. ↑ Skiffle is 'n folkmusiek genre, met invloede van blues, jazz en Amerikaanse folkmusiek. Dit word gewoonlik uitgevoer met behulp van 'n mengsel van vervaardigde, tuisgemaakte of geïmproviseerde instrumente. Dit het as musiekvorm ontstaan in die eerste helfte van die 20ste eeu in die Verenigde State, en uiters gewild geword in die VK in die 1950's, waar dit deur kunstenaars soos Lonnie Donegan, The Vipers Skiffle Group, Ken Colyer en Chas McDevitt gespeel is. Skiffle het 'n groot deel uitgemaak van die vroeë loopbane van sommige musikante wat later prominente jazz-, pop-, blues-, folk- en rockkunstenaars sou word, soos byvoorbeeld The Beatles en Rory Gallagher. Dit is gesien as 'n kritiese stap tot die tweede Britse folkmusiek herlewing, die Britse blues-oplewing en die Britse oorheersing van Amerikaanse populêre musiek
  8. ↑ "Peter Sarstedt - British Singer-songwriter".
  9. ↑ "Peter Sarsedt Biography". Music Entertainment Network. Geargiveer vanaf die oorspronklike op 24 Julie 2011. Besoek op 2 Oktober 2009.
  10. ↑ 10,0 10,1 "Obituary: Peter Sarstedt, singer-songwriter who topped charts with Where Do You Go To (My Lovely)". scotsman.com/. Besoek op 12 Januarie 2017.
  11. ↑ "Peter Sarstedt dies". The Times. 9 Januarie 2017. Besoek op 9 Januarie 2017.

Eksterne skakels[wysig | wysig bron]

Ontsluit van "https://af.wikipedia.org/w/index.php?title=Peter_Sarstedt&oldid=2565875"