Piet Muller

in Wikipedia, die vrye ensiklopedie

Piet Muller (*18 Junie 1938, Warden - ) is 'n joernalis, bekende rubriekskrywer, politieke kommentator, futuroloog en spiritualis. Hy skryf ook fiksie onder die skuilnaam Jan Mellet.

Lewe en werk[wysig | wysig bron]

Petrus Johannes Muller is op 18 Junie 1938 op Warden in die Vrystaat gebore, waar sy vader Piet vanaf 1933 tot ongeveer 1962 die skoolhoof was. Sy ma is Martie en hy het ’n broer, Ampie, wat later getroud is met N.P. van Wyk Louw se dogter Ria.[1]

Piet studeer aan die Universiteit van die Oranje-Vrystaat, waar hy die B.A.-graad met hoofvakke wysbegeerte en staatsleer (cum laude) en die B.A. Honneurs-graad verwerf. Hierna verwerf hy ’n M.A.-graad aan die Universiteit van Kaapstad en hy promoveer (Ph.D.-graad) in Filosofie aan die Universiteit van Pretoria. Hy is ook ’n geregistreerde hipnoterapeut (CtH).

As joernalis begin hy in 1959 sy loopbaan by Die Volksblad in Bloemfontein, waarna hy van 1960 tot 1968 as uitgewer by Human & Rousseau in Kaapstad werksaam is en daarna tot einde 1977 in vennootskap ’n uitgewery onder die maatskappy Muller en Retief (Edms.) Bpk. bedryf. Van 1978 tot 1987 is hy assistent-redakteur van Beeld in Pretoria en hy word dan in 1987 stigter-redakteur van die tydskrif Insig en daarna in 1990 assistent-redakteur van Rapport. Vanaf 1993 doen hy vryskutwerk. Hy is ’n bekende rubriekskrywer, politieke kommentator en futuroloog en is medestigter van twee uitgewershuise, waaronder Academica.[2] As politieke joernalis ontvang hy die SFW-toekenning vir joernalisme vir sy bydrae tot die onderhandelings tussen die ANC en die destydse regering voor die oorgang na demokratiese regering in Suid-Afrika.

As skilder hou hy ook tentoonstellings van sy kunswerke, die eerste in 1994 in Galerie Estelle Rossouw in Lynnwood in Pretoria. Hy raak diep betrokke by spiritualisme, is medestigter van die Sentrum vir Eietydse Spiritualiteit[3] en bedryf die blog www.spiritualiteit-in-aksie.com/ Geargiveer 15 September 2016 op Wayback Machine, waarin hy gereeld meningstukke skryf. Hy is getroud met Anne-Marie

Skryfwerk[wysig | wysig bron]

’n Keur uit die rubrieke wat hy vir Beeld in Beeld-Deurloop en vir die Afrikaanse radiodiens van die Suid-Afrikaanse Uitsaaikorporasie (SAUK) skryf word saamgebundel in Vir parrafienblik en simbaal.[4] Hierin kyk hy met nuwe oë na die alledaagshede rondom hom en beskryf telkens die ligter sy van elke saak.[5][6]

Piet Muller se gepubliseerde nie-fiksie boeke dek studievelde soos die teorie van vertaling, kommunikasiekunde, filosofie, kreatiwiteit, spiritualiteit en futurologie. Publikasies sluit in self-help boeke soos Sukses na vyftig, Visualisering: Gedagtes wat heelmaak. Hy skryf ook boeke oor die godsdiens, onder andere Die nuwe hervorming, waarin hy totaal breek met die tradisionele Christelike dogma en ’n benadering voorstaan waarin spiritualiteit as uitgangspunt gebruik word.[7] Die Evangelie van Thomas is ’n publikasie van hierdie antieke boek (met verklarende aantekeninge), waarin verlore gesegdes van Jesus opgeteken is. More is 'n nuwe spel is ’n boek oor die futurologie, wat ook in Engels uitgegee word as Tomorrow is a new game. Saam met George Claassen en Morkel van Tonder stel hy Die grootste Afrikaanse aanhalingsboek met aforistiese spreuke saam.

Hy skryf ook boeke onder die skuilnaam Jan Mellet. Manne van staal is ’n boek oor ontdekkers, wat onder andere insluit die Kon-Tiki ekspedisie, die Rus Joeri Gagarin wat die eerste mens in die ruimte was, die verowering van Everest en die ondersese avonture van Jacques Cousteau.[8]

Publikasies[wysig | wysig bron]

Piet Muller[wysig | wysig bron]

Fiksie[wysig | wysig bron]

Jaar Publikasie
1982 Vir paraffienblik en simbaal

Nie-fiksie[wysig | wysig bron]

Jaar Publikasie
1978 Die leefwêreld en die struktuur van die Suneideton
1986 Handwerk in klei
1994 Kreatiwiteit: vra is verpligtend
1997 Escape to creativity
Die roos van stilte: tweeduisend jaar van Westerse meditasie
1998 Die groot aanhalingsboek (saam met George Claassen en Morkel van Tonder)
2001 Meditasie- die gawe van stilte
More is ’n nuwe spel
Sukses na vyftig
Visualisering: gedagtes wat heelmaak
2002 Die  Nuwe Hervorming
2004 Sal ons nog droom as ons dood is?

Jan Mellet[wysig | wysig bron]

Jaar Publikasie
1960 Manne van staal
1965 Stede uit die stof

Bronne[wysig | wysig bron]

Boeke[wysig | wysig bron]

  • Steyn, J.C. “Van Wyk Louw: ’n Lewensverhaal Deel II” Tafelberg-uitgewers Beperk Eerste uitgawe 1998

Tydskrifte en Koerante[wysig | wysig bron]

  • Erasmus, Elfra “Op 56 word ’n ou droom waar” “Beeld” 25 Augustus 1994

Verwysings[wysig | wysig bron]

  1. J.C. Steyn se “Van Wyk Louw: ’n Lewensverhaal Deel II” bladsye 821 en 853
  2. Who’s Who SA: http://whoswho.co.za/petrus-muller-3260 Geargiveer 14 Augustus 2017 op Wayback Machine
  3. Renaissance Spirituele Gemeenskap: http://www.renaissancegem.co.za/piet-muller.php Geargiveer 4 November 2015 op Wayback Machine
  4. Esaach: http://www.esaach.org.za/index.php?title=Muller,_Piet
  5. Brink, André P. “Rapport” 3 Oktober 1982
  6. Johl, Ronél “Die Burger” 11 November 1982
  7. Christelike Kernensiklopedie: http://cke.christians.co.za/2016/03/23/muller-petrus-johannes-piet/ Geargiveer 3 Oktober 2018 op Wayback Machine
  8. Esaach: http://www.esaach.org.za/index.php?title=Mellet,_Jan