Preah Khan

in Wikipedia, die vrye ensiklopedie
Preah Khan
Koördinate 13°27′43.1″N 103°52′17.7″O / 13.461972°N 103.871583°O / 13.461972; 103.871583
Plaaslike naam  ប្រាសាទព្រះខ័ន
Land Vlag van Kambodja Kambodja
Soort Tempel
Streek Siem Reap
Geskiedenis
Bouer Jayavarman VII
Gestig 1191 (voltooi)
Tydperk Middeleeue
Kulture Khmer-ryk

Preah Khan (Khmer: ប្រាសាទព្រះខ័ន; "Koninklike Swaard") is ’n tempel uit die Khmer-ryk in Angkor, Kambodja. Dit is in die 12de eeu gebou vir koning Jayavarman VII ter ere van sy pa.[1]:383–384,389[2]:174–176 Dit is noordoos van Angkor Thom geleë en wes van die Jayatataka-baray, waarmee dit verbind is, en was die sentrum van ’n aansienlike organisasie met amper 100 000 amptenare en diensknegte. Dit het ’n plat ontwerp volgens ’n basiese plan, met opeenvolgende reghoekige galerye om ’n Boeddhistiese heiligdom. Daaromheen is kleiner Hindoe-tempels en talle latere byvoegsels. Nes die nabygeleë Ta Prohm, wat Jayavarman VII vir sy ma laat bou het, is Preah Khan feitlik glad nie gerestoureer nie en talle bome an ander plante groei tussen die ruïnes.

Terrein[wysig | wysig bron]

Preah Khan is gebou op die terrein van Jayavarman VII se oorwinning in 1191 oor die invallende Champa. Die terrein was vroeër beset deur die koninklike paleise van Yasovarman II en Tribhuvanadityavarman. Die tempel se hoofbeeld, van die bodhisattva Avalokiteśvara, is in die vorm van die koning se pa. Nog 430 gode het altare op die terrein. Die tempel se skatte sluit in goud, silwer, edelstene en pêrels. Die instelling het die rol vertolk van stad, tempel en Boeddhistiese universiteit.

Min werk is aan die tempel gedoen. Daar is probeer om ’n balans te handhaaf tussen restourasie en die bewaring van die natuurtoestande waarin die tempel ontdek is. Die buitenste muur van Preah Khan het 72 mitiese voëls en slange en word deur ’n grag omring. Die hoofingang kyk oos, maar daar is ook ander, elk met ’n paadjie oor die grag.

Die hooftempel was Boeddhisties, maar drie kleiner tempels op die terrein is onderskeidelik aan die Hindoegod Shiva, vorige konings en koninginne en Vishnu gewy.

Galery[wysig | wysig bron]

Verwysings[wysig | wysig bron]

  1. Higham, C., 2014, Early Mainland Southeast Asia, Bangkok: River Books Co., Ltd., ISBN 9786167339443
  2. Coedès, George (1968). Walter F. Vella (red.). The Indianized States of Southeast Asia. trans.Susan Brown Cowing. University of Hawaii Press. ISBN 978-0-8248-0368-1.

Eksterne skakels[wysig | wysig bron]

Koördinate: 13°27′43.1″N 103°52′17.7″O / 13.461972°N 103.871583°O / 13.461972; 103.871583