Rochester, Kent

in Wikipedia, die vrye ensiklopedie
Rochester
Town
Die katedraal van Rochester
Die katedraal van Rochester
Rochester is in Engeland
Rochester
Rochester
Koördinate: 51°24′8″N 0°29′21″O / 51.40222°N 0.48917°O / 51.40222; 0.48917
LandVlag van Verenigde Koninkryk Verenigde Koninkryk
LandVlag van Engeland Engeland
Seremoniële graafskapKent
Unitêre owerheidMedway
Bevolking
 • Totaal62 982
TydsoneUTC+00:00 (MGT)
 • SomertydUTC+01:00 (BST)
Poskode
ME1, ME2
Skakelkodes01634

Rochester [ˈrɒtʃɪstər] is 'n nedersetting in die seremoniële graafskap Kent in die suidooste van Engeland wat administratief onder die unitêre owerheid Medway val. Tussen 1211 en 1998 het Rochester as City of Rochester stadstatus gehad. Om administratiewe en ander redes is besluit om hierdie status nie te bewaar nie. Rochester is aan die River Medway geleë, sowat 50 km suidoos van Londen. Eeue lank was die Britse Vloot se skeepswerf op die Medway die basis vir Rochester se ekonomie - net soos dié van Chatham en Gillingham. Die werf se sluiting in 1984 het 'n leemte in die gebied se ekonomiese lewe gelaat.

Rochester se geskiedenis strek ver terug in die verlede. Die huidige nedersetting het sy oorsprong in 'n klein Saksiese dorpie. Sy Normandiese katedraal van 1077 (die huidige gebou dateer uit die 12de en 13de eeu), as kerk gestig in 604, is op een na die oudste in Engeland, net soos die diosees waarvoor dit as geestelike middelpunt dien. Die Normandiese kasteel van Rochester is op die hoogste punt van die historiese Romeinse stadsmuur opgerig om die laaste drif van die Medwayrivier voor sy monding te beskerm en bied vanuit sy toring, wat onder die hoogstes in Engeland gereken word, uitsigte oor die omgewing.

"Ah! fine place - glorious pile - frowning walls - tottering arches - dark nooks - crumbling staircases - Old Cathedral too."
Mr Jingle se beskrywing van Rochester in Charles Dickens se The Pickwick Papers

Die historiese boukuns en besonderse atmosfeer van Rochester en sy omgewing was 'n inspirasie vir een van die invloedrykste skrywers in Victoriaanse Engeland, Charles Dickens (1812–1870). Dickens het in Chatham, 'n naburige nedersetting, van sy kinderjare deurgebring (sy familie het hulle daar gevestig toe hy vyf jaar oud was) en lang staptoere met sy vader onderneem.[1] Later het hy 'n landelike woning in Higham naby Rochester bewoon - met 'n chalet in die Switserse styl waar baie van sy romans ontstaan het. Die skrywer het só onder Rochester se indruk gestaan dat dit in sy literêre werke 'n belangriker plek inneem as Londen. Baie van Rochester se argitektoniese besienswaardighede word in sy romans beskryf, waaronder die Elisabethaanse Restoration House van 1587 (die woning van Estella en Miss Havisham in Great Expectations), The Six Poor Travellers' House (ook bekend as Watts Charity, 'n gashuis wat vanaf die 1580's tot in die tyd van die Tweede Wêreldoorlog verblyf gebied het vir arm reisigers, onsterflik gemaak in een van Dickens se kersverhale), Eastgate House en Guildhall Museum wat aan die plaaslike geskiedenis gewy is.

Verwysings[wysig | wysig bron]

  1. Keith Spence: The Companion Guide to Kent and Sussex. New edition. Woodbridge: Companion Guides 1999, bl. 18

Eksterne skakels[wysig | wysig bron]

Geskiedenis

Toerisme