Sergei Golofkin

	Sergei Golofkin
Gebore	26 November 1959 ; Moskou, Sowjetunie
Oorlede	2 Augustus 1996 (op 36) ; Moskou, Rusland
Rede vir dood	Teregstelling
Land	Sowjetunie, Rusland
Bynaam	Die Visser, Die Boa, ; Tsjikatilo se Leerling
Misdaad	Reeksmoord
	Misdaadbesonderhede
Plek	Moskou en omgewing
Datum(s)	1986-1992
Slagoffers	11-13+
Metode	Verkragting, verwurging
Motief	Seks, sadisme
	Vonnisbesonderhede
Aangekeer	19 Oktober 1992
Vonnisdatum	19 Oktober 1994
Vonnis	Doodstraf

Sergei Aleksandrowitsj Golofkin (Russies: Серге́й Александрович Головкин; 26 November 1959 - 2 Augustus 1996) was ’n reeksmoordenaar in die Sowjetunie en later Rusland. Hy is skuldig bevind aan die moord op 11 seuns tussen 10 en 15 jaar oud tussen 1986 en 1992 in die Moskou-omgewing.^[1] Golofkin, wat ook as Die Visser en Die Boa bekend was, het jong seuns in sy kelder en die woude buite Moskou gemartel, verkrag en vermoor.

Golofkin was die laaste mens wat in Rusland tereggestel is voordat die doodstraf in dié land opgeskort is.^[2]

Agtergrond[wysig | wysig bron]

Golofkin is op 26 November 1959 in Moskou gebore. Sy pa was ’n alkoholis en sy ouers is in 1988 geskei.^[2] Hy is met ’n geboortedefek in sy borsbeen gebore en het dikwels brongitis en slegte spysvertering gehad. Op skool is hy as ’n alleenloper beskou en sy skoolmaats het opgelet hy het glad nie in meisies belanggestel nie. Hy het ook aan onwillekeurige urinering gely en was bang sy klasmaats sou sy urine ruik. Golofkin was ’n klasmaat van Armen Grigorjan van die rockgroep Krematori.^[3] Toe Golojkin 13 jaar oud was, het hy tekens van sadisme begin toon; hy het byvoorbeeld ’n kat gevang, huis toe geneem en opgehang.

In 1982 het Golofkin sy skoolloopbaan voltooi. Hy het by ’n resiesbaan begin werk en daarna as ’n veekundige by ’n boerdery in Moskou. Vir sy prestasies in perdetelingsontwikkeling is ’n silwermedalje in 1989 op ’n handelskou aan Golofkin toegeken.

In 1984 het hy sover bekend sy eerste misdaad gepleeg toe hy probeer het om ’n jong seun te verkrag en vermoor.

Moorde[wysig | wysig bron]

Moorde in Moskou-oblast[wysig | wysig bron]

In April 1986 het Golofkin sy eerste moord gepleeg, naby ’n spoorwegstasie in Nekrasof, Moskou-oblast, net buite Moskou. Hy het die 15-jarige Andrei Pawlof ontmoet, met ’n mes gedreig en hom die woud in gesleep. Pawlof is verkrag en verwurg, en Golofkin het daarna nekrofilie gepleeg.

In Julie die volgende jaar het Golofkin sy tweede moord gepleeg; hy het die 12-jarige Andrei Goeljajef uit ’n somerkamp naby Odintsowo, Moskou-oblast, ontvoer. Goeljajef is ook met ’n mes gedreig, verkrag en verwurg, en daarna het Golofkin sy ledemate afgesny.

Vier dae ná Goeljajef se moord is die liggaam van ’n 16-jarige in die Odintsofski-distrik ontdek. Hy is altesaam 35 keer met ’n mes gesteek en sy ledemate is daarna afgesny. Later het Golofkin ontken dat hy dié moord gepleeg het.

Garagemoorde[wysig | wysig bron]

In 1988 het Golofkin ’n beige WAZ-2103-motor gekoop. Hy het dit in sy garage gehou waar hy ’n kelder begin bou het, aanvanklik om as ’n werkwinkel te gebruik. Hy het egter besef dis die ideale plek vir sy seksmisdade. Van Augustus 1990 af het Golofkin agt seuns tussen 10 en 15 jaar oud vermoor; in ’n stadium het hy twee seuns tegelykertyd gemartel.^[2] In September 1992 het hy drie seuns wat hy na sy garage gelok het, verkrag en vermoor. Die laaste een het hy 12 uur lank gemartel en verkrag voordat hy hom opgehang en werk toe gegaan het.^[1]

Arres en vonnis[wysig | wysig bron]

Op 5 Oktober 1992, drie weke ná die laaste moord, is die liggame van die laaste drie slagoffers deur sampioenplukkers ontdek. Op 19 Oktober is Golofkin as verdagte deur die polisie aangehou. Gedurende die ondervraging was hy kalm en het skuld ontken. Die ondervraers het besluit om hom te laat gaan, maar in die geheim dop te hou. ’n Polisieman het egter die bevel verontagsaam en Golofkin vir die nag in eensame opsluiting geplaas. Die volgende oggend is Golofkin weer ondervra en hy het skuld op die laaste drie moorde beken.

Die polisie het die dag daarna Golofkin se garage deursoek en ’n bababad met ’n gebrande vellaag en bloed, klere en liggaamsdele gevind. Golofkin het toe skuld aan 11 moorde beken en onthul waar hy van sy slagoffers se lyke ontslae geraak het. Daar is bevind hy is by sy sinne, maar ’n skisofreen. Hy is op 19 Oktober 1994 tot dood veroordeel.

Op 2 Augustus 1996 is Golofkin tereggestel met ’n enkele skoot in sy agterkop. Hy is die laaste mens wat in Rusland tereggestel is voordat Rusland die doodstraf in dié jaar opgeskort het.^[2]

"Die Visser"[wysig | wysig bron]

Tydens die ondersoek het ’n kennis van een van die slagoffers vertel hy het ’n man ontmoet wat hom as Die Visser voorgestel het; hy het ’n tatoe aan sy regterarm gehad van ’n dolk en slang wat om mekaar gedraai is asook die woord "Visser". Mettertyd is vasgestel dis nie waar nie, maar dit het vir lank ’n vals leidraad verskaf en gelei tot die bynaam "Die Visser". Dit het aansienlike aandag in die media gekry.

Daarna het Golofkin hom as Die Visser aan sy slagoffers voorgestel.