Walter Battiss

Walter Battiss
Geboortenaam	Walter Whall Battiss
Geboorte	6 Januarie 1906 Somerset-Oos
Sterfte	20 Augustus 1982 (op 76) Port Shepstone
Nasionaliteit	Suid-Afrika
Beroep	Kunsskilder en skrywer
Huweliksmaat	Grace Anderson
Webblad	Walter Battiss

Die ou offisiersmenasie in Pauletstraat huisves die Walter Battiss-kunsmuseum, waar die grootste versameling van sy skilderye tentoongestel word.

Binnekant van die Walter Battiss-kunsmuseum.

Walter Battiss (1906–1982) was 'n Suid-Afrikaanse kunstenaar en deskundige op die gebied van Boesmanskilderye. Hy word as een van Suid-Afrika se eerste en belangrikste abstrakte skilders beskou. Van sy werk kan in die Walter Battiss-kunsmuseum in Somerset-Oos besigtig word.

Battiss is sterk deur Afrikakuns beïnvloed, wat hy ook indringend bestudeer het. Sy kunswerke gee uitdrukking aan die krag en misterie van Afrika en die waardigheid van die Afrikamens. Hy is bekend as die skepper van die "Fook-eiland"-konsep, die eiland van die verbeelding, ’n utopiese samestelling van die eilande wat hy besoek het. Talle bekende Suid-Afrikaners was ereburgers van Battiss se Fook-eiland, met paspoorte en al.

Lewensloop

Walter Whall Battiss is op 6 Januarie 1906 op Somerset-Oos in die Kaapland gebore. In 1917 trek hy saam met sy gesin na Koffiefontein in die Vrystaat, waar hy 'n belangstelling in argeologie en primitiewe kuns ontwikkel. In 1919 trek hulle na Fauresmith, waar hy in 1923 matrikuleer.

Battiss word in 1924 as 'n klerk in Rustenburg se landdroskantoor aangestel. Hy begin sy kunsstudie in 1929 aan die Witwatersrand Tegniese Kollege (teken en skilder), gevolg deur die Johannesburgse Opleidingskollege (onderwysdiploma) en neem ook etsklasse. Battiss sit sy studie as klerk van die landdros voort, en behaal op 35-jarige ouderdom 'n B.A.-graad in beeldende kunste an die Universiteit van Suid-Afrika.

Hy ontwikkel 'n sterk persoonlike styl en tree tot die onderwys toe. Onder die werke wat hom bekendgemaak het, is sy uitgebreide ondersoek en kritiese ontleding van Boesmankuns, waaroor hy talle boeke geskryf het.

In 1981 skenk hy al sy werke aan die pas geopende Walter Battiss-kunsmuseum op sy geboortedorp, Somerset-Oos.

Hy is op 20 Augustus 1982 op 76-jarige ouderdom in Port Shepstone aan 'n hartaanval oorlede.

Sien ook

• Lys van Suid-Afrikaanse kunstenaars
• Hulle het ons eeu gevorm

Bronne

• Ensiklopedie van Suidelike Afrika, Eric Rosenthal, 1967

Eksterne skakels

• Webtuiste van die Walter Battiss-kunsmuseum
• Wikimedia Commons het meer media in die kategorie Walter Battiss.