Audrey Blignault

Audrey Blignault (gebore 6 Julie 1916 ) is 'n Afrikaanse skrywer.

Biografie

Sy is gebore in Bredasdorp, Suid-Afrika. Haar volle naam was Audrey Bettie Blignault. Sy word tweetalig groot, maar gaan skool in Engels. Sy besluit om in Afrikaans te skryf nadat sy deur haar studie van die Afrikaanse letterkunde op die Universiteit van Stellenbosch met "die opwindende en verrykende vernuwing" van die Afrikaanse poësie in aanraking gekom het. Sy was die redakteur van Die Huisvrou, doen radiowerk vanaf 1946 met veral twee programme Wat kan ek lees? en Boeke vir ons kinders, en was 'n rubriekskrywer vir Sarie Marais vanaf 1950. In 1967 is sy betrokke in 'n ernstige motorvoertuigongeluk en is 'n geruime tydperk in 'n koma. Sy verloor haar eerste eggenoot, Andries Blignault, in dieselfde ongeluk. Sy trou in 1970 met A J (Attie) de Villiers. Die egpaar woon in Tuine in Kaapstad.

Sy verwerf die Eugène Maraisprys in 1961 vir haar eerste twee boeke, die W.A. Hofmeyer-prys in 1965 vir Met ligter tred en ander prosa, die Italiaanse Adelaide Ristori-prys in 1980 vir haar waardevolle bydraes tot kultuur, en die Staatspresidentstoekenning in 1982 vir uitmuntende diens. Sy word die eerste vrou om tot die bestuur van die Suid-Afrikaanse Akademie vir Wetenskap en Kuns verkies te word, in 1973, en word 'n erelid daarvan in 1994. Sy ontvang ook 'n eredoktorsgraad van die Universiteit van Stellenbosch in 1991.

Bibliografie

• In klein maat -- 1955
• Die vrolike lied -- 1957
• Met ligter tred -- 1962
• Die blye dae -- 1965
• Die plesierboom -- 1967
• Om die son te aanskou -- 1968
• Die verlange loop ver -- 1969
• Die rooi granaat -- 1970
• Die wind van die see af -- 1972
• Nogtans sal ek jubel (saamgestel deur Elize Botha) -- 1977
• Pas op vir Jantatarat -- 1979
• Van leser tot leser('n handleiding vir leeskringe) -- 1980
• Die goue vreugde (geïllustreerd deur Cora Coetzee) -- 1985
• 'n Oulap se rooi('n bundel essays) -- 1988
• Die eindelose avontuur: venster op die wêreldletterkunde -- 1993
• Dit rëen rose (outobiografiese verhale) -- 1996
• Mal Hansie en ander verhale (saamgestel deur Elize Botha en Hennie Aucamp) -- 1996

Bron

Verwerk vanaf Stellenboschwriters - Blignault.