Gaan na inhoud

Taekwondo

in Wikipedia, die vrye ensiklopedie
Piktogram wat Taekwondo aandui
Taekwondo-wedstryd
Taekwondo-demonstrasie

Taekwondo (Koreaans: 태권도) is ’n ongewapende vegkuns wat van Korea afkomstig is, maar wat op ’n Japannese karate fondasie gebou is.[1][2] Die term "taekwondo" vertaal losweg as: “tae” voet, “kwon” hand of vuis en “do” die manier of die weg. Taekwondo is dus die gebruik van die ledemate vir selfverdediging en deugde-ontwikkeling[3], en is ook ’n vegsport en Olimpiese sport.[4]

Etimologie

[wysig | wysig bron]

Die term "taekwondo" (óók "Taekwon-Do" en "Tae Kwon Do") is deur die Suid-Koreaanse generaal Choi Hong Hi en sy assistent majoor Nam Tae Hi in 1955 geskep[1][4] en is op drie Sjinese logogramme gebasseer: 跆拳道.

Die eerste logogram "tae" (Sjinees: 跆; Koreaans: 태) is ’n nuutskepping deur Choi[2] en suggereer ’n voet bo-op ’n objek (platvorm) en word gewoonlik vertaal as ’n spring, trap of skop aksie.[4]

Die tweede logogram, "kwon" (óók "gwon") (Sjinees: 拳; Koreaans: 권) vertaal as vuis en is metonomie vir boks, dus vorm die karakter gereeld deel van die naam van verskeie Sjinees- en Koreaanse vegkunste, byvoorbeel taichi-quan (Sjinees: 太極拳; Koreaans: 태극권)(’n Sjinese vegkuns) en gwonbeop (Sjinees: 拳法; Koreaans: 권법) (’n Koreaanse vegkuns).

Laastens, vertaal "do" (Sjinees: 道; Koreaans: 도) letterlik as ’n pad of weg; die woord het egter sterk Oosterse filosofiese konotasies, en verwys na die Tao (Taoïstiese filosofiese konsep), wat metafories dui op die korrekte pad wat gestap moet word, of die mees korrekte manier (beide ergonomies en moreel) waarop ’n aksie verrig moet word. Afhangende van die konteks kan "do" ook vertaal word as kuns, dissipline, praktyk, metodiek, of selfs filosofie. Die byvoeging van die "do" agtervoegsel was ’n algemene praktyk vir Oosterse vegkunste wat in die laat 19de en 20ste eeu ontwikkel het. Waarskynlik die eerste gebruik hiervan is in Japan met die term "kendo" (weg van die swaard). Ander voorbeelde sluit in: judo, tang soo do, hapkido en jeet kune do.

Tesame kan "taekwondo" vertaal word as die "weg of kuns van skop en slaan". Choi Hong Hi het dit ook gedefinieer as die Koreaanse kuns van selfverdediging.[3]

Daar word beweer dat Choi Hong Hi die eerste twee karakters "Taekwon" (태권) geskies het, nie net vir hul semantiese betekenis nie, maar ook om foneties soortgelyk te klink aan "taekkyeon" (택견)[1][4] (dit word óók op verskeie ander maniere gespel, byvoorbeeld "t’aekkyŏn" en "taekkyun", afhangende van die Romaniseringsisteem), ’n tradisionele Koreaanse vegkuns en volkspel.


Verwysings

[wysig | wysig bron]
  1. 1 2 3 Kimm, He Young (2013). Taekwondo History. Baton Rouge, LA: Hando Press. ISBN 978-0-9890807-8-1.
  2. 1 2 Moenig, Udo; Cho, Sungkyun; Kwak, Taek Yong. "Evidence of Taekwondo's Roots in Karate: An Analysis of the Technical Content of Early Taekwondo Literature". Korea Journal. 54 (2): 150–178.
  3. 1 2 Choi Hong Hi (1999). "Definition of Taekwon-Do". Encyclopedia of Taekwon-Do 1.  
  4. 1 2 3 4 Song, Jongbeom; Kim, Youngsun; Lim, Taehee (2022). Taekwondo Textbook: 1 Introduction to Taekwondo. Seoul, Korea: Kukkiwon. ISBN 979-11-91659-03-0.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Taekwondo&oldid=2840801"