Team 10

in Wikipedia, die vrye ensiklopedie
Team 10 se vergadering in 1959 in Otterlo, Nederland (tydens die CIAM '59) wat deur 43 deelnemers bygewoon is

Team 10 — dikwels ook Team X of Team ten genoem — was 'n klein internasionale groep argitekte en ander uitgenodigdes wat vir die eerste keer in Julie 1953 tydens die 9de Konges van Moderne Argitektuur (Frans: Congrès Internationaux d'Architecture Moderne, kort CIAM) in Aix-en-Provence, Frankryk vergader het. Die groep was ontevrede met die CIAM se rasionalistiese standpunte ten opsigte van urbanisme en stadsbeplanning, wat hulle as ouderwets bestempel het, asook die organisasie se burokratiese strukture. Hul kritiek was veral gemik op dogmatiese verteenwoordigers van modernistiese boukuns soos Le Corbusier. Die groep het uiteindelik daarin geslaag om die CIAM te herstruktureer.[1]

Die naam "Team 10" is aan die groep gegee nadat hulle nog in Aix-en-Provence die opdrag gekry het om die 10de (en laaste) CIAM-kongres te organiseer. Nadat die CIAM uiteindelik ontbind is, het die lede van Team 10 begin om op hul eie te werk.

In die 1950's en 1960's het van Europa se leidende argitekte by Team 10 aangesluit, onder wie Aldo van Eyck en Jaap Bakema (Nederland), Alison en Peter Smithson (Verenigde Koninkryk), Giancarlo de Carlo (Italië), Georges Candilis (Frankryk), Shadrach Woods (Verenigde State) en Stefan Wewerka (Duitsland). Team 10 se visie was om 'n moderne, stelselmatige en tegnologie-georiënteerde argitektuur volgens menslike maatstawe te ontwikkel - met 'n sterk sosiale komponent wat voorsiening sou maak vir verskillende gemeenskappe se behoeftes.[2]

Team 10 se eerste formele byeenkoms onder dié naam het in 1960 in Bagnols-sur-Cèze, Frankryk plaasgevind. Net vier lede het die laaste vergadering in 1981 in Lissabon, Portugal bygewoon. Ná die afsterwe van Jaap Bakema in dieselfde jaar het die groep besluit om te ontbind.

Verwysings[wysig | wysig bron]