Verstekwaarde

in Wikipedia, die vrye ensiklopedie

'n Verstekwaarde (Engels: default value) is 'n waarde wat gebruik of toegeken word as een nie verskaf word nie. Dit word tipies in sagtewareontwikkeling gebruik om 'n waarde aan 'n veranderlike toe te ken as die gebruiker dit oorslaan of 'n vooraf ingevulde waarde aanvaar. In so 'n geval word 'n waarde by verstek deur die program of toestel toegeken.

'n Verstekwaarde is gewoonlik voor die hand liggend. Om 'n paar voorbeelde te noem:

  • As items aanlyn gekoop word, word aangeneem dat die persoon een item per soort sal neem. Die waarde "1" word dus vooraf ingevul, en kan gewysig of so aanvaar word.
  • As 'n treinrit bespreek word, kan 'n program aanneem dat die gebruiker dit "vandag" wil doen. Indien nie, sal die gebruiker die verstek tydwaarde moet verander.
  • Gedeeltes van 'n gebruiker se afleweringsadres (bv. land van verblyf) kan volgens sy IP-adres bepaal en vooraf ingevul word.

Verstekwaardes help om programme en elektroniese toestelle meer gebruikersvriendelik te maak. Dit spaar die gebruiker die moeite om 'n waarde in te vul. Verstekwaardes is dus 'n noodsaaklike element van minimalistiese gebruikerskoppelvlakke en kan help om gebruikersfoute te vermy.

Voorafbepaalde verstekwaardes word gewoonlik deur die ontwikkelaar gekies in 'n poging om dit makliker en vinniger te maak om die produk te gebruik. Sommige programme laat mense ook toe om verstekwaardes in hul persoonlike voorkeure te stoor. Webwerwe kan ook koekies gebruik om voorkeure te stoor en velde vooraf in te vul. Kunsmatige intelligensie kan selfs ingespan word om die gebruikers se voorkeure aan te leer.

Rekenaartale[wysig | wysig bron]

Die meeste programmeertale (soos C++ en Java) laat die gebruik van funksies en prosedures toe. Parameters kan gebruik word om veranderlike data na so 'n prosedure of funksie te stuur. Verstekwaardes kan dan aan opsionele parameters toegeken word. As die opsionele parameters dan weggelaat word, sal die verstekwaarde aangeneem word.

'n C++-voorbeeld, waar die verstekwaarde 3 aan die derde parameter toegeken word:

int my_funksie(int a, int b, int c=3)

Bovermelde funksie kan met twee of drie parameters geroep word:

resultaat1 = my_funksie(1, 2, 3);
resultaat2 = my_funksie(1, 2);

Databasisse[wysig | wysig bron]

Tabelle met verstekwaardes kan in meeste databasisse geskep word. Rekords kan opsionele kolomme/velde bevat. 'n MySQL-voorbeeld:

CREATE TABLE werknemers (
   ID             int NOT NULL,
   Voornaam       varchar(255) NOT NULL,
   Salaris        int,
   AftreeOuderdom int DEFAULT 65
); 

As rekords in bovermelde tabel gelaai word, en die aftree-ouderdom word nie verskaf nie, sal 'n ouderdom van 65 jaar aangeneem word.

Verwysings[wysig | wysig bron]