Vyf beskaafde stamme

in Wikipedia, die vrye ensiklopedie
Jump to navigation Jump to search
Die vyf beskaafde stamme. Hierdie portrette is tussen 1775 en 1850 geteken/geskilder.
Kaart van die "Cherokee Strip" of "Cherokee Outlet", 1885

Die vyf beskaafde stamme is 'n versamelnaam vir vyf inheemse Amerikaanse stamme, naamlik die Cherokee, Chickasaw, Choctaw, Muscogee (Creek) en die Seminole. Hierdie stamme is deur Europese setlaars as beskaafd beskou omdat hulle baie van die tradisies van die kolonialiste aangeneem het en oor die algemeen goeie verhoudings met hul bure gehandhaaf het. Die vyf beskaafde stamme het in die suidooste van die Verenigde State gewoon voordat hulle na ander dele van die land, hoofsaaklik die huidige Oklahoma, verskuif is.

Vandag beskou talle inheemse Amerikaners, veral die van ander stamme, die term as kleinerend en rassisties. Wanneer daar tans oor hierdie stamme gepraat word, word die term "vyf stamme" soms gebruik om die suggestie dat ander stamme barbaars is (of was) te vermy.

Hierdie vyf stamme is uit hul woongebied na die weste van die VSA verskuif. Die bekendste hiervan was die dramatiese "Trail of tears" (spoor van trane) in 1838, toe president Martin van Buren die omstrede verdrag van New Echota in werking gestel en die Indiane se land in die ooste vir land in die weste verruil het.

Die vyf stamme was tydens die Amerikaanse Burgeroorlog erg verdeeld. Die Choctaw en Chickasaw het hoofsaaklik aan die kant van die Konfederasie geveg, terwyl die Muskogi, Seminole en die Cherokee tussen die Unie en die Konfederasie verdeeld was. Die Cherokee het 'n burgeroorlog in eie geledere tussen diegene wat die verskillende kante gesteun het geveg.

Toe die stamme na die reservaat verskuif is, het die regering belowe dat hul land vry van blanke setlaars sou bly. Sommige pioniers breek hierdie ooreenkoms al voor 1893, toe die regering die Cherokee Strip vir bewoning deur buitestaanders geopen het. In 1907 is die territoria van Oklahoma en die Indianereservaat tot die nuwe staat Oklahoma saamgevoeg. Al vyf die stamme is tans daar verteenwoordig.