Walentin Serof

in Wikipedia, die vrye ensiklopedie
Jump to navigation Jump to search
Walentin Serof - selfportret
Olie op doek, 1880's

Walentin Alexandrowitsj Serof (Russies: Валентин Александрович Серов; wetenskaplike transliterasie: Valentin Aleksandrovič Serov; Sint Petersburg, 19 Januarie 1865 − Moskou, 5 Desember 1911[1]) was 'n Russiese skilder, grafikus en portretskilder. Hy word as een van die verteenwoordigers van Russiese Jugendstil- of Art Nouveau-skilderkuns beskou. Nogtans het sy skilderstyle 'n wye spektrum gedek wat van ligte impressionistiese skilderye tot donker simbolisme gestrek het.

Serof is in Sint Petersburg gebore as seun van die komponis Alexander Serof en sy vrou Walentina Bergman, 'n komponis van Duits-Joodse en Engelse afkoms. Serof het sy opleiding in Parys en Moskou onder Ilja Repin begin en onder Pavel Kristjakof tussen 1880 en 1885 aan die Sint Petersburgse Kunsakademie voltooi. Sy vroeë kreatiwiteit is aangwakker deur Repin se realistiese kuns en Kristjakof se streng opvoedkundige raamwerk. Daarnaas het die skilderkuns van ou meesters, wat Serof in Russiese en Wes-Europese musea kon bewonder, sy vriendskapsbande met Michail Wroebel en - op 'n latere tydstip - Konstantin Korowin sterk invloed uitgeoefen op die jong skilder, net soos die kreatiewe atmosfeer in die kunstenaarskolonie Abramtsewo waarmee hy 'n noue band gehandhaaf het.

Gedurende die laaste kulturele bloeitydperk in die Tsareryk in die twee dekades voor die Eerste Wêreldoorlog, die sogenaamde Silwer Tydperk, was Serof 'n gewilde portretskilder vir die boonste lae van die Russiese samelewing in Moskou en Sint Petersburg. Die lang lys van persoonlikhede, wat deur Serof geportretteer is, sluit welvarende burgers, adellikes en die Tsaregesin in.

Walentin Serof was lid van die Peredwisjniki, 'n groep van Sint Petersburgse kunstenaars wat uit protes teen die beperkings van die Keiserlike Kunsakademie in die Newa-metropool 'n genootskap van rondtrekkende skilders gestig het en met hul uitstallings dwarsoor Rusland toegang tot die kunste vir breë lae van die bevolking verskaf het[2], en Mir iskoesstwa («Wêreld van kuns»), die ballet-impresario Sergei Diaghilev se kunsbeweging rondom die gelyknamige kunstydskrif.[3]

Verwysings[wysig | wysig bron]