Wilhelm Liebenberg
Wilhelm Louis Liebenberg is ’n anti-apartheidsaktivis en ’n Afrikaanse skrywer. Hy was 'n lektor in Afrikaans aan Rhodes-universiteit in Grahamstad en later die Universiteit van die Witwatersrand in Johannesburg.
Lewe en werk[wysig | wysig bron]
Wilhelm Liebenberg is oorspronklik van die Kaap en studeer aanvanklik ingenieurswese. Hy het grade van die Universiteit Stellenbosch en die Universiteit van Kaapstad, voordat hy die Drs.Litt.-graad in Utrecht in Nederland behaal en daarna in 1991 sy Ph.D.-graad aan die Universiteit van die Witwatersrand. Die titel van sy proefskrif is “Die begrip ‘teken’ in ‘Tristia’ van N.P. van Wyk Louw”. Hy is in die tagtigerjare verbonde aan Rhodes-universiteit en daarna as senior lektor aan die Universiteit van die Witwatersrand. Hy is ’n spesialis in die studievelde van Literêre Teorie en Vergelykende Letterkunde en dien ook op die bestuur van die Suid-Afrikaanse Vereniging vir Algemene Literatuurwetenskap. Tydens die tagtigerjare neem hy deel aan die politieke struggle in die Oos-Kaap en aan die Rand en is hy besonder aktief in die bedrywighede van die veelrassige United Democratic Front en die Mass Democratic Movement en is ’n ampsdraer van die Johannesburg Democratic Action Committee. Hy is 'n dienspligweieraar en tree ook op as woordvoerder van die End Conscription Campaign wat op grond van gewetensbesware teen die regeringsbeleid weier om militêre diensplig te verrig. In 1989 woon hy die geskiedkundige ontmoeting tussen skrywers en die toe nog verbode ANC by die Victoria-valle by. Hy word in September 1989 by sy huis in Johannesburg in hegtenis geneem en vir ’n lang ruk op De Aar sonder verhoor aangehou in terme van die destydse noodmaatreëls. Ingevolge artikel 3 van die noodregulasies van daardie tyd is voorsiening gemaak vir onbeperkte aanhouding sonder verhoor. Hy is ’n lid van die Congress of South African Writers. Later verlaat hy die akademie om verder te studeer in die Oosterse spiritualisme en is 'n meditasie-instrukteer. Hy bly in Kaapstad.
Skryfwerk[wysig | wysig bron]
Hy publiseer 'n roman, As die nood hoog is. Jacques Malan, en die nagraadse student Lisa teen die agtergrond van die politieke toestand in Suid-Afrika in die tagtigerjare. Jacques is getroud met Hanlief, maar na sy toenadering tot Lisa skeefloop, raak hy betrokke by die jong student Mari-Lou. Lisa raak op haar beurt betrokke by die swart aktivis Elvis. Dit is ’n parodie op André P. Brink se “States of emergency”, maar verwek by die verskyning daarvan meer opspraak weens die eksplisiete seksbeskrywings as weens die politieke aard daarvan.[1]
Wilhelm se publikasies in akademiese tydskrifte dek die velde van taalwetenskap, dekonstruksie, postmodernisme, poësie, poststrukturalisme, narratologie en ideologie, terwyl hy ook ’n gereelde medewerker was van Vrye Weekblad en bydraes lewer tot De Kat en Spil Plus. Hy maak ook ’n bydrae tot die boek “Literêre terme en teorieë” onder redaksie van T.T. Cloete.
Publikasies[wysig | wysig bron]
| Jaar | Publikasies |
|---|---|
| 1993 | As die nood hoog is |
Bronnelys[wysig | wysig bron]
Boeke[wysig | wysig bron]
- Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005
- Liebenberg, Wilhelm “As die nood hoog is” Hond Uitgewers Groenkloof Eerste druk 1993
Tydskrifte en koerante[wysig | wysig bron]
- Anoniem “Dosent se aanhouding ’n slag, sê Gilde” “Die Burger” 5 September 1989
- Anoniem “Liebenberg in aanhouding” “Vrye Weekblad” 8 September 1989
- Anoniem “Saval eis verhoor vir Liebenberg” “Rapport” 17 September 1989
Internet[wysig | wysig bron]
Verwysings[wysig | wysig bron]
- ↑ Hambidge, Joan “Insig” April 1993
