Xian Y-7

in Wikipedia, die vrye ensiklopedie
Xian Y-7-100 van China General Aviation

Die Xian Y-7 (Chinees: 运-7, Pinyin: Yùn-qī) is 'n ligte passasiersvliegtuig wat in China gebou word.[1] Dit is gebaseer op die Sowjet-ontwerpte Antonof An-24-reeks.[2]

Ontwikkeling[wysig | wysig bron]

China het die Antonof An-24 reeds vroeg in sy produksieloop ingevoer en ook lisensies vir die vervaardiging van die vliegtuie en sy enjins beding. In 1966 het die Xi'an-vliegtuigfabriek met die plaaslike produksieprojek van die An-24 begin. Die eerste An-24T wat deur die Chinese saamgestel is, het op 25 Desember 1970 sy nooiensvlug onderneem. Die produksie is in 1977 geloods by die Xi'an-vliegtuigfabriek, maar die vordering was stadig weens die nadelige gevolge van die Kulturele Rewolusie, met 'n voorproduksievliegtuig wat op 17 April 1982 aan die publiek by die Nanyuan-lugbasis naby Beijing vertoon is. Die Dongan WJ-5A1 turboskroefenjin is as die Y-7 se kragbron gekies. Die eerste produksievliegtuig het eers in Februarie 1984 gevlieg, wat 'n aanduiding is van die stadige vordering (agtien jaar van lisensie tot produksie).[2]

Die Chinese vliegtuie is gelykgestel aan die An-24RV met 'n volledige stel vensters en die aanjaerstraalenjin. Die grootste deel van die vroeë aflewerings is aan die Lugmag van die Volksbevrydingsleër (People's Liberation Army Air Force [PLAAF]) gelewer, meestal vir vervoer, met 'n paar in 52-sitplek-lugrederykonfigurasie vir die Civil Aviation Administration of China (CAAC). Na die aanvanklike gelisensieerde produksieloop, is die Y-7 apart van die An-24 ontwikkel met 'n reeks opgraderings wat uitloop op die Xian MA60 (Modern Ark)-reeks.[2]

'n Taktiese vervoer-afgeleide is vanaf die Antonof An-26 gekopieër, sonder lisensie, en het na vore getree as die Y-7H, volledig met die vragluikdeur en militêre toerusting van die An-26.[2]

Xian Y-7 in die Beijing Burgerlugvaartmuseum
Xian Y-7-100 in die Beijing Burgerlugvaartmuseum

Verwysings[wysig | wysig bron]

  1. Gordon, Yefim; Komissarov, Dmitry (2008). Chinese Aircraft:China's aviation industry since 1951. Manchester: Hikoki Publications. pp. 196–207. ISBN 978-1-902109-04-6.
  2. 2,0 2,1 2,2 2,3 Gordon, Yefim; Komissarov, Dmitry; Komissarov, Sergey (2003). Antonov's Turboprop Twins. Hinkley: Midland. pp. 5–40. ISBN 978-1-85780-153-8.

Eksterne skakels[wysig | wysig bron]