Broodpoeding

in Wikipedia, die vrye ensiklopedie
Spring na: navigasie, soek
Austin Leslie se Kreoolse Broodpoeding is in die voormalige Pampy's Restaurant in New Orleans (Louisiana) met vanielje-whiskey-sous bedien

Broodpoeding is 'n gewilde nagereg in die kookkuns van Groot-Brittanje, die suidelike Verenigde State, België, Noord-Duitsland en Frankryk. In Frankryk word dit pouding au pain en in België bodding en broodpudding genoem. Broodpoeding word van ou snye brood, vet, eiers, suiker of stroop, speserye en droëvrugte gemaak. Die deurweekte snye brood word uitgedruk en met die ander bestanddele vermeng. Die mengsel word in 'n bak geplaas en in die oond gebak.

Broodpoeding word dikwels met 'n soet sous bedien, soos byvoorbeeld whiskey-, rum- of karamelsous, maar oorspronklik is dit net met suiker bestrooi, in stukkies gesny en koud geniet.

Geskiedenis[wysig]

Mense het reeds in die prehistoriese tydperk brood gebak, en die vroegste bekende resepte van soet en geurige broodpoedings dateer uit die antieke tydperk. Dit was moontlik spaarsame kokke wat hul ou brood nog vir 'n gereg wou gebruik. Ou of harde brood is reeds vroeg onder meer as 'n soort houer gebruik waarin byvoorbeeld sop bedien is (Italiaanse sjefs het in die Middeleeue hiervoor veral foccaccia-brood gebruik), as 'n vulsel vir vleisgeregte en as 'n verdikker by poedings. In 19de eeuse kookboeke het resepte vir broodpoedings dikwels in die hoofstukke oor "Kos vir siekes" verskyn. Die resepte varieer volgens die broodsoorte wat gebruik word.