Cronulla

in Wikipedia, die vrye ensiklopedie
Spring na: navigasie, soek
Kingsway in Cronulla

Cronulla is 'n woonbuurt langs 'n strandgebied in die suide van Sydney in Nieu-Suid-Wallis, Australië. Cronulla is sowat 26 km suid van Sydney se sentrale sakekern geleë in die plaaslike regeringsgebied van Sutherland Shire.

Cronulla is geleë op 'n skiereiland wat begrens word deur Botany Bay in die noorde, Bate Bay in die ooste, Port Hacking in die suide en Gunnamatta Bay in die weste. Die aangrensende woonbuurt Woolooware lê wes van Cronulla. Die Kurnell skiereiland, die plek waar James Cook vir die eerste keer in 1770 aan wal gegaan het word binnegegaan deur noordoos vanuit Cronulla te ry op Captain Cook Drive.

Strande[wysig]

Die strand by Elouera Beach

Cronulla is 'n gewilde toeriste trekpleister en lok baie baaiers van oral oor Sydney heen. Cronulla Beach is 'n lang strand wat vanaf Boat Harbour tot by North Cronulla strek, gevolg deur rotspoele en nog 'n sanderige strandgebied in South Cronulla. Die strande van Cronulla vanaf noord na suid is: Boat Harbour, Wanda Beach, Elouera Beach, North Cronulla Beach, Cronulla Beach, Blackwoods Beach, Shelly Beach en Oak Park. Die strande is 'n gewilde plek vir ontspanning en verskeie watersportsoorte insluitend swem, branderplankryery en andere.

Shark Island is 'n eiland net buite Cronulla Beach en is 'n gewilde plek vir branderplankryery en daar word jaarliks 'n kompetisie genaamd die Shark Island Challenge daar aangebied. Gunnamatta Bay bied ook beskermde swemplekke langs Gunnamatta Park. Port Hacking is ook 'n gewilde plek vir waterski aktiwiteite.

Parke[wysig]

  • Bass Point en Flinders Point is die suidelikste deel van Cronulla. Daar is ook monumente hier ter ere van die ontdekkingsreisigers George Bass en Matthew Flinders wat die Port Hacking mondingsmeer eerste verken het.
  • Darook Park, Gunnamatta Park en Tonkin Park is almal langs Gunnamatta Bay geleë.
  • Cronulla Park is reg agter die strand in South Cronulla geleë.
  • Dunningham Park is reg agter die strand by North Cronulla en het 'n groot klomp Norfolk-eiland denne daarin.
  • Munro Park wat die Cronulla oorlogsmonument bevat is oorkant Cronulla spoorweghalte geleë.
  • Shelly Park is reg agter Shelley Beach geleë.

Sakegebied[wysig]

Cronulla soos gesien vanaf Burraneer

Die hoof winkelkompleks is langs Cronulla straat geleë wat deels omgeskakel is om slegs vir voetgangerverkeer voorsiening te maak en as Cronulla Plaza bekend staan. Die sakegebied strek ook verder na Kingsway, Gerrale Street en ander omliggende strate. Cronulla het 'n kafeekultuur ontwikkel met baie kafees en restourante langs North Cronulla se strandgebied en in Cronulla Plaza. Toeriste het die keuse van 'n hele aantal hotelle, motelle en woonstelle. Cronulla het vele besienswaardighede wat onafhanklike bioskope, nagklubs en kroeë insluit.

Vervoer[wysig]

  • Die Cronulla tak van die Illawara lyn eindig in Cronulla en is deel van die Sydney se groter spoornetwerk.
  • Daar is veerbootdienste vanaf Cronulla na Port Hacking en daar is ook 'n gereelde veerbootdiens na Bundeena op die grens van die Royal National Park.
  • Daar is ook drie busroetes wat vanaf Cronulla se spoorweghalte vertrek na onderskeidelik Miranda, Caringbah en Kurnell.

Skole[wysig]

Cronulla is die tuiste van verskeie laer- en hoërskole: Cronulla High School, De La Salle College, Our Lady of Mercy College, Cronulla Publich School, South Cronulla Public School, St Francis De Sales, Burraneer Bay Public School en St Aloysius Catholic Primary School.

Kerke[wysig]

St Andrews Anglikaanse kerk, St Aloysius Katolieke kerk, Cronulla Baptiste kerk, Cronulla Uniting Church en die Presbiteriaanse War Memorial Church is almal in Cronulla geleë.

Geskiedenis[wysig]

Cronulla is afgelei van 'n inboorlingwoord kurranulla wat plek van die pienk seeskulpe beteken. Matthew Flinders en Geore Bass het die kuslyn en die Port Hacking mondingsmeer in 1796 verken en gekarteer en die suidelikste deel van Cronulla word Bass and Flinders Point genoem ter ere van hulle. John Connel was die eerste grondeienaar in die gebied gewees in 1835. Thomas Holt het die meeste grond hier besit. Hy het 'n stuk grond vanaf Sutherland tot in Cronulla besit in die 1860's. Holt het Sutherland House opgerig langs die Gwawley Bay seefront in 1818 aan die oostekant van Sylvania. Die Cronulla gebied is in 1895 onderverdeel en grond is te koop aangebied teen 'n prys van 10 pond per akker. In 1899 het die regering die gebied Gunnamatta genoem. Op 26 Februarie 1908 is die naam amptelik verander na Cronulla en is Gunnamatta slegs gebruik vir die baai aan die westekant.

Na die Illawarra spoorlyn na Sutherland in 1885 gebou is, het die gebied baie gewild geword onder piekniekgangers en baaiers. Trems is in 1911 tussen Sutherland en Cronulla in werking gestel. Baie mense het strandhuise in Cronulla gehuur vir skoolvakansies. Die Oriental Hotel is in 1888 deur Kaptein Spingall gebou op die plek agter die huidige North Cronulla Hotel. Die Cecil Hotel was op die seefront van South Cronulla geleë en die Ritz Café was ook baie gewild onder vakansiegangers. 'n Woonstel genaamd Cecil Apartments is op die plek gebou waar die hotel geleë was. Die stoomtrems is in 1939 met die Cronulla tak van die Illawarra lyn vervang.[1]

Die poskantoor het in Januarie van 1891 oopgemaak in wat toe as Cronulla Beach bekend gestaan het maar is weer in 1893 gesluit. In 1907 is die poskantoor weer oopgemaak en die naam na Cronulla verander in 1929. Die eerste skool is in 1910 gestig. Vanaf die 1950's is die vele gastehuise vervang met woonstelle. Ten spyte daarvan dat Cronulla as 'n woonbuurt ontwikkel het, het dit steeds gewild gebly by baaiers en toeriste. Verskeie hotelle, motelle en woonstelle vir tydelike verblyf is daar beskikbaar. Die Cronulla Bicentennial Plaza is in Februarie 1989 oopgestel.

In 2005 het onluste en geweldadige konfrontasies op Cronulla se strandfront voorgekom.[2] Hierdie insidente het oor verskeie dae plaasgevind en ook na ander dele van Sydney versprei.[3].

Verwysings[wysig]

  1. The Book of Sydney Suburbs, Saamgestel deur Frances Pollen, Angus & Robertson Publishers, 1990, Slegs in Australië gepubliseer ISBN 0-207-14495-8
  2. "Mob violence envelops Cronulla", Australian Associated Press, 2005-12-11. URL besoek op 2006-08-31.
  3. "Now churches are targeted", The Australian, onbekend. URL besoek op 2006-08-31.

Eksterne skakels[wysig]