Edward Smith (seekaptein)

in Wikipedia, die vrye ensiklopedie
Spring na: navigasie, soek
Edward John Smith
’n Beeld van die betrokke persoonlikheid.
Kaptein Edward J. Smith

Gebore 27 Januarie 1850
Hanley, Staffordshire, Engeland
Oorlede 15 April 1912 (62 jaar oud)
RMS Titanic, Atlantiese Oseaan
Nasionaliteit Koninkryk van Groot-Brittanje
Beroep Skeepskaptein
Huweliksmaat Sarah Eleanor Pennington (1887-1912)
Kind(ers) Helen Melville Smith (1898-1973)

Edward John Smith (* 27 Januarie 1850; † 15 April 1912) was 'n reserwe-offisier in die Britse Koninklike Vloot wat as offisier in bevel op 'n verskeidenheid passasierskepe van die White Star Line-redery gedien het. Hy het veral bekendheid verwerf as die kaptein van die noodlottige RMS Titanic en het gesterf nadat dié skip op sy nooiensvaart in April 1912 'n ysberg getref en gesink het.

Privaat lewe[wysig]

Edward John Smith is op 27 Januarie 1850 in Well Street, Hanley, Staffordshire as seun van Edward Smith, 'n pottebakker, en sy vrou Catherine Hancock (née Marsh) gebore. Sy ouers is op 2 Augustus 1841 in Shelton, Staffordshire getrou. Hulle het later 'n winkel bedryf.

Smith het tot op die ouderdom van dertien by die British School in Etruria, Staffordshire skool gegaan en daarna 'n stoomhamer by die plaaslike smitswinkel bedien. In 1867, toe hy 17 jaar oud was, het hy na Liverpool gegaan om in die voetspore van sy halfbroer Joseph Hancock, 'n kaptein op 'n seilskip, te volg. Hy het sy opleiding op die Senator Weber ontvang, 'n skip van die Liverpoolse redery A. Gibson & Co.

Op 13 Januarie 1887 het Smith in die St. Oswaldskerk te Winwick in Cheshire met Sarah Eleanor Pennington getrou. Uit die huwelik is op 2 April 1898 in Waterloo, Liverpool 'n dogter, Helen Melville Smith, gebore. Die gesin het destyds 'n indrukwekkende baksteenhuis, Woodhead, in Winn Road, Highfield, Southampton bewoon.

Loopbaan[wysig]

Skeepskaptein[wysig]

Die Blou Vaandel (Blue Ensign)

In Maart 1880 is Edward Smith as vierde offisier op die SS Celtic, 'n stoomskip van White Star Line, aangestel. Hy het sy diens op skepe verrig wat roetes na Australië en New York bedien het en hier vinnig in sy loopbaan gevorder. In 1887 het hy vir die eerste keer as kaptein die kommando op 'n White Star-skip, die Republic, gevoer.

In 1888 het Smith sy Ekstra Meestersertifikaat (Extra Master's Certificate) behaal en tot die Koninklike Vlootreserwe (Royal Naval Reserve) toegetree. Hy was sodoende as volle luitenant gekwalifiseer en kon sy militêre rang as RNR agter sy naam skryf. In oorlogstye kon hy opgeroep word om in die Koninklike Vloot te dien. Vanweë sy militêre rang as kommandeur in die Vlootreserwe was Smith se skepe geregtig om die Blou Vaandel van die Koninklike Vlootreserwe te gebruik - in teenstelling met Britse handelskepe wat die Rooi Vaandel (ook bekend as Red Duster) vertoon het.

Groter skepe[wysig]

Die SS Majestic

Vanaf 1895 het Smith nege jaar as kaptein van die SS Majestic gedien. Toe die Boereoorlog in 1899 begin het, is Majestic opgeroep om troepe na die Kaapkolonie te vervoer. Smith het twee vaarte na Suid-Afrika onderneem wat sonder voorvalle verloop het, en vir sy dienste het koning Edward VII in 1903 die Transport Medal ("Vervoermedalje") met die "Suid-Afrika"-gespe aan hom toegeken.

Smith is vervolgens as 'n "veilige kaptein" beskou. Nadat hy jare lank ervaring op see opgedoen het, het hy by passasiers en bemanningslede 'n reputasie vir rustige gesofistikeerdheid verdien. Sommige passasiers het transatlantiese reise uitsluitlik op skepe onderneem wat onder kaptein Smith se bevel was. Hy het gaandeweg as die "miljoenêrs se kaptein" bekend gestaan omdat Engelse hoërklas-passasiers gewoonlik skepe onder sy kommando gekies het.

Vanaf 1904 was White Star Line se nuutste skepe op hulle nooiensvaarte onder beheer van kaptein Smith. In dieselfde jaar het die redery die kapteinskap oor die destyds grootste skip ter wêreld, die Baltic, aan Smith toevertrou. Die Baltic het op 29 Junie 1904 vanaf Southampton-hawe vir haar nooiensvaart na New York vertrek en dit sonder voorvalle voltooi. Ná drie jaar as kaptein van die Baltic het Smith die bevel oor sy tweede groot skip, die Adriatic, oorgeneem. Ook dié skip het sy nooiensvaart suksesvol voltooi.

Tydens sy kapteinskap oor die Adriatic het Smith die Koninklike Vlootreserwe se dekorasie vir langtermyndiens ontvang en is gelyktydig tot kommandeur bevorder. Vervolgens is na hom verwys as "Kaptein Edward John Smith, RD, RNR", waarby RD "Reserve Decoration" beteken.

Nalatenskap[wysig]

'n Standbeeld ter nagedagtenis van kaptein Smith is in Beacon Park, Lichfield, Engeland opgerig. Die inskrif lees:

Capt. of R.M.S. Titanic
COMMANDER
EDWARD JOHN SMITH R.D. R.N.R.
BORN JANUARY 27 1850 DIED APRIL 15 1912
BEQUEATHING TO HIS COUNTRYMEN
THE MEMORY & EXAMPLE OF A GREAT HEART
A BRAVE LIFE AND A HEROIC DEATH
"BE BRITISH"