Gautrein
 |
Die artikel beskryf 'n aktuele gebeurtenis. Die inligting op hierdie bladsy kan vinnig verander soos nuwe data beskikbaar raak. |
Die Gautrein is 'n 80km lange hoëspoed-treinroete in Gauteng, Suid-Afrika. Die projek is ontwerp om Johannesburg (Sandton) via OR Tambo Internasionale Lughawe (Johannesburg Internasionale Lughawe) met Pretoria (Tshwane) te verbind; altesaam 10 stasies is beplan (9 is reeds voltooi).
Aanvanklik sou die projek op een slag in diens gestel word, maar as gevolg van die 2010-Sokker Wêreldbeker wat in Suid-Afrika gehou is, is slegs die eerste fase tussen OR Tambo en Sandton in 2010 betyds vir die wêreldbeker voltooi.
Die tweede fase is op 2 Augustus 2011 in diens gestel en verbind Hatfield (Pretoria) met Sandton en Sandton met Rosebank.[1] Die finale fase tussen Rosebank en Johannesburg (Parkstasie) sal eers in diens gestel word wanneer die waterprobleme in die tonnel opgelos is. Tans word ongeveer 6 miljoen liter water daagliks uit die tonnel in die Zandspruit gepomp.[2]
Inhoud |
[wysig] Die ontwikkeling van die projek
[wysig] Die projek
In die middel van die jaar 2000 het Sam Shilowa, die Premier van Gauteng, die implementering van hierdie projek afgekondig. Die naam van die projek is afgelei van die naam van Gauteng; deels omrede albei stede (Johannesburg en Pretoria) in die provinsie geleë is.
Een van die doelwitte van die projek was om die verkeersinfrastruktuur te verbeter tussen die twee belangrikste stede in Gauteng. Die deurslaggewende punt was die feit dat die FIFA Sokker-Wêreldbekertoernooi in 2010 in Suid-Afrika aangebied is. Mnr. Jack van der Merwe is as projek bestuurder aangestel.
In 2002 is voornemende kontrakteurs genooi om tenders in te dien. Daar was sowat R7 miljard vir die projek beskikbaar gestel. Twee konsortiums, Bombela en Gauliwe, het tenders ingedien. Na beoordeling van die tenders is die projek aan die Bombela-konsortium toegeken. Hulle het toe in die begin van Oktober 2004 enorme druk op die regering uitgeoefen en gedreig dat hulle uit die wedloop sal onttrek indien die kostes vir die projek nie verhoog sou word nie. Die finale koste het uiteindelik verhoog tot R23 miljard.
Die Bombela-konsortium, wat die kontrak verkry het, is saamgestel uit 4 firmas, waarvan elkeen 'n aandeel van 25 persent hou. Die Franse Maatskappy Bouygues Travaux Publics is vir die grawe van die tonnels verantwoordelik. Bombardier, 'n Kanadese maatskappy, verskaf die waens en lokomotiewe. Daarby is nog twee Suid-Afrikaanse maatskappye Murray & Roberts, 'n boukonstruksiemaatskappy, asook Strategic Partners Group ('n swart bemagtigingsgroep) wat deel van die konsortium uitmaak.
[wysig] Boukostes
Die projek is die grootste en duurste transport infrastruktuur projek wat ooit deur die provinsiale regering voorgestel is, maar snaaks genoeg is dit nooit in die provinsiale wetgewer gedebatteer of voorgelê aan enige belangrike openbare debat voor dit goedgekeur en die tender uitgegee is nie. Oorspronklik het die kostes van die projek sowat R3.5 - 4 Miljard beloop in 2000 toe die projek deur die Premier Shilowa voorgestel is. Hierdie bedrag is hersien na R7 Miljard vir die doel van die OIS (Omgewing Inpak Studie) proses in 2003 en was later gefinaliseer op R20 Miljard (sowat $3.7 Miljard) in 2005, daarna is 'n suksesvolle bieder vir die projek bekendgemaak en die kontrak het tot stand gekom.[3]
Die Nasionale en provinsiale regerings sal elk R 10 biljoen bydra en die konsessiehouer, Bombela, sal die res bydra. Die grootste gedeelte van die finansiering benodig was deur middel van lenings voorsien. Die finansiering koste is nog nie bekend gemaak nie.
[wysig] Tydlyn van kostes (konstruksie)
- 2002 R 3.5 - 4 miljard (aanvanklike koste voorgestel)
- 2003 R 7 miljard hersiende kostes
- 2005 R20 miljard hersiende kostes
- 2006 R25.2 miljard goedgekeurde beraamde koste[4]
- 2010 R26 miljard [5]
- 2011 R25.4 miljard[6] (U$3.66b)[7]
[wysig] Kritiek
Daar was aanvanklik baie kritiek teen die projek. Daar is kritiek teen die feit dat die townships van Suid-Afrika (soos Soweto in Johannesburg en Mamelodi in Pretoria) nie in die projek ingesluit is nie. 'n Verdere probleem is ook die interskakeling met ander transportmodusse bv, taxis en busse. Dit is beplan om sowat 150 busse te gebruik om in 'n radius van 15 km om die stasies mense te bedien.
[wysig] Ligging van stasies
Die volgende nege stasies is reeds voltooi:
- Rosebank (ondergronds)
- Sandton (ondergronds)
- Marlboro (grondvloer)
- Midrand (grondvloer)
- Centurion (bogronds)
- Pretoria (grondvloer)
- Hatfield (grondvloer)
- Rhodesfield (bogronds)
- OR Tambo Internasionale Lughawe (bogronds)
In aanbou (waterprobleem moet eers opgelos word alvorens dit oopgestel kan word):
- Parkstasie in Johannesburg (ondergronds)
[wysig] Tegniese gegewens
Die topspoed van die treine is 160 km/h, die reistyd vanaf Parkstasie in Johannesburg na Hatfield, die eindstasie in Pretoria, sal ongeveer 42 minute duur. Die tog vanaf Sandton-stasie na die Internasionale Lughawe is 15 minute. Daar sal altesaam 24 treine beskikbaar wees bestaande uit 4 waens elk en tydens spitstyd 8 waens elk. Tussen Pretoria (Tshwane) en Johannesburg sal daar in spitstyd elke 12 minute 'n trein vertrek en buite spitstyd elke 18 minute. Naweke sal daar elke halfuur 'n trein beskikbaar wees.
Die spoorwydte van die trein is breër as die standaard 1 067 mm Suid-Afrikaanse smalspoor, ook bekend as Kaapspoor (Engels: Cape Gauge); die standaard Europese spoorwydte van 1435 mm word gevolg.
[wysig] Ritkostes en -prosedures
Alvorens 'n persoon die trein (of die trein se busse en parkering) kan gebruik, moet 'n goue kaart aangekoop word en geld op die kaart gelaai word. Die kaarte kan by stasies aangeskaf word deur 'n vorm in te vul en R10 te betaal. 'n Minimum van R20 moet gelaai word voordat u enige van die dienste kan gebruik.
Betaal-soos-u-reis, sowel as periodiese pakkette is vir gereelde reisigers beskikbaar. Ritkostes word by stasies en op die Gautrein se webtuiste gepubliseer.
[wysig] Parkering
Parkeergeriewe is by stasies beskikbaar. Die eerste 15 minute van parkering by stasies is gratis, daarna word R10 vir die eerste 24 uur gehef op voorwaarde dat die trein gebruik word. Parkering sonder dat die trein gebruik word beloop R80 vir die eerste 24 uur.
[wysig] Busse
Busse word ingespan om mense in 'n radius van ongeveer 15km om stasies te bedien. Busgelde beloop R20 ongeag waar 'n persoon op- of afklim. As 'n persoon binne 1 uur 'n trein gebruik, word R14 op die kaart gekrediteer en die busrit kos dan slegs R6. Tydens spitstye vertrek busse elke 12 minute vanaf die gemerkte busstoppe; andersins elke 20 minute.
[wysig] Veiligheid
Sekuriteitswagte is 24 uur per dag op stasies beskikbaar en alle treine word deur sekuriteitskameras dopgehou. Alle trokke is ook van 'n noodstop-fasiliteit voorsien wat deur passasiers geaktiveer kan word.
[wysig] Verwysings
- ^ Van Pta na Jozi binne 38 minute!, Beeld, 2 Augustus 2011
- ^ Gautrein ry gou tussen Pta, Jhb, Beeld, 29 Julie 2011
- ^ Anna, Cox, "Shilowa's R20bn silence", The Star, 1 November 2005.
- ^ Hamlyn, Michael. "Gautrain to cost R25.5bn". Fin24. URL besoek op 2008-03-30.
- ^ Mahlong, Audra. "Gautrain ready for 2010". ITWeb. URL besoek op 2010-01-13.
- ^ Venter, Irma, "Countdown begins as Gautrain steams towards June deadline", Engineering News, Creamer Media, 2011-05-27. URL besoek op 2011-05-28.
- ^ Dixon, Robyn, "High-speed train gives South Africa a lift", Los Angeles Times, 2010-06-09. URL besoek op 2011-05-28.
