Hester Krüger
Hester Krüger (née Coetsee, Bethulie, Oranje-Vrystaat, 24 Desember 1884 – Stellenbosch [waarskynlik], 21 Januarie 1984) was ’n predikantsvrou in die Gereformeerde Kerk. Haar man, dr. I.D. Krüger (1882–1965), met wie sy 54 jaar lank getroud was tot sy dood, was predikant in vyf gemeentes: Aliwal-Noord (1911–1916), Bloemfontein (1916–1923), Potchefstroom (1923–1930), Bloemfontein (1930–1945), Venterstad (1945–1949), Oos-Londen (1949–1954).
Reeds in die jaar van huwelik, 1911, is ’n Dorkasvereniging op Aliwal-Noord gestig. Onder haar en haar man se leiding het eindelik ses Dorkasverenigings tot stand gekom. Werkgeselskappe, waarvan die ledetal sowat 30 tot 40 was, het gereeld in die plaaslike pastorie byeengekom. Mev. Krüger het dogters van die gemeente onderrig in handwerk en kunsnaaldwerk gegee en self geskilder.
Gesinslewe[wysig | wysig bron]
Die egpaar Krüger se dogter Monica was getroud met die appèlregter F. Rumpff, seun van ds. Derk en mev. Femke Rumpff, en Rita met prof. Pieter Verhoef (25 April 1914 – 18 Januarie 2013), hoogleraar aan die Stellenbosse Kweekskool, van 1975 tot 1979 dekaan van die Universiteit Stellenbosch se teologiese fakulteit[1] en lid van die redaksie van die 1983-vertaling van die Afrikaanse Bybel. Uit Verhoef se pen het in 1998 verskyn Ds. I.D. Krüger: Die mens en sy Preke.[2] Nog ’n dogter, Christine Louw, was vroueredaktrise van Die Oosterlig. Daar was ook ’n seun wat sy pa se name gekry het.
Bronne[wysig | wysig bron]
- (af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.
Verwysings[wysig | wysig bron]
- ↑ (af) Geskiedenis herhaal hom met kerktwis ná belydenis, Die Burger, 4 Desember 1990. URL besoek op 23 Augustus 2015.
- ↑ (en) P.A. Verhoef op Stellenbosch Writers. URL besoek op 18 Julie 2016.